U heh ka BJP uwa man leh u dkhot ka National Council ka Party, u Bashailang Khongwir da beiñ joor u ya ka Congress wa da pynman kaam Politics ko ya i man i long hapoh ka jylla deiwa chim kabu yeiwa jia na ka jylla cha ka ri waroh kawi.
U heh ka Congress ha ka jylla, u Mukul Sangma toh u kreh u chirup wa ka sorkar kam ha ini i por heithaw wow pynkyllooh ya ka sorkar, da ong ka BJP.
U Khongwir da beiñ u leh ya i klam u AICC General Secretary Randeep Singh Surjewala, uwa da kam wa ki damok wa tymmoh khmat da uiñ ki ya ka Shillong deiwa rah ya ki suloi, heiwa u Khongwir da ong u wa kam ini i klam da pynchrai i ya ki khynroo.
Da ong u leh wa ka Congress da toh u leh Homework ko neibhah wa ki seiñ kieñ suloi da khlan bha ki ha ka thaaiñ heipor wa synchaar ka Congress wei wot heipor wa synchaar ko ha ka jylla wa ha sorkar pyrdi ymye ko wow pynbait ya i klam yasuk wa ka HNLC.
Chooh chooh u Khongwir da yaroh u leh ya u montri rangbah ka jylla ym em phah pulit u cha ki thaw wa em i awri iwa ye u heh wei ini pynyoo u wa ngait skem u ya ki paidbah wei da rai u leh wow kyrriah noh ya ka CRPF Camp na Mawlai.
Da kyntu u leh wow embynta ha ka Peace Committee ka sorkar kawa ymjooh em heipor wa synchaar ka Congress khnang wow pynbait ya ki kaam. Da ban u leh wa ka sorkar da toh u yaklam yasuk noh ko wa ka HNLC khamtam hadien wa ka seiñ da tyrwa yaklam ko nadooh nachwa.
Heijooh i por da kyntu u leh ya ki khynroo wow wanrah ya i chongsuk neibynta i bha ka imlang sahlang waroh kawi.
