Ka seiñ Hynñiewtrep Integrated Territorial Organization (HITO) da beiñ ko yei klam u heh ka Congress u Randeep Singh Surjewala uwa da tip bha chaphang ka thaaiñ North East khamtam ya ka Meghalaya iwa da pynkhyrngiat ya ki paidbah kiwa maya yei suk khamtam ha kini ki por. Heiwa u Surjewala da ong u yeiwa leh ki kattu katni ki khynroo kiwa rah ya ka kari pulit deilang wa ki suloi wei da uiñ ki chawah chaneiñ la kam ki Taliban.
Ka HITO da ong ko wa ym em kam kitæ ki Terrorist ha Meghalaya, wei iwa jia toh deiwa leh chongchit ki kattu katni iwa mih nei chrai pyrchah yeiwa da leh ki pulit wow pynkut yei mynsien u Cherishsterfield Thangkhiew.
Ka HITO da kylli ko na u Sujrewala wa heiwon i rukom wa da kamtre ka Taliban ya ki “BLACK MASK” wei lada ym em de mo kiwi kiwa pynemkaam ya kini ki that rong yong wow tymmoh yei dur khmat iwa da leh da kiwa boon nadooh ki por kiwa nachwa.
Kamtæ ka HITO da kyrmen ko wa ini toh du i sñiaw samen u Sujrewala wei ym toh i yong ka Indian National Congress waroh, heiwa hadooh ka Indira Gandhi leh da mynjur ko yei yakhih wa jai jai yow dawa yoh jylla da ka yong i hi.
Lada u Sujrewala khut u ya ki khon ka ri kam ki ‘Taliban’ itæ da mut wa ki dkhot ka Meghalaya Youth Congress leh da man Terrorist lang ki.
Ka HITO da kyntu ko ya u Rahul Gandhi kam u khynroo wow sñiawthooh yei chem chitom ki khynroo kiwa katni wei wow pynchitom ya uni u dkhot ka Congress wei wow sdang kreh yow yoh biang yei kyrchaan ki bru ka Meghalaya.