Ka seiñ kiwa khayi ya kawa tip kam ka Forein Trade Chamber of Commerce Meghalaya (FTCCM), ynne ka sngi da lai yachem ko ya u Deputy Commissioner ka West Jaiñtia Hills wow kyrpaad u elaad noh ya kiwa khayi cha baar ri namo ki Exporter wa chalan mar cha Bangladesh lyngba ka Dawki LCS wow pynpsiah kari cha Bangladesh kamwa man ha u snem wa dadep.
Ka seiñ da ong ko wa da wai biang ya ka khayi pateiñ ha khappood ha ka 6 Naiynñiaw 2021 da ka yung krehkaam u SDO ka Amlarem.
Chooh chooh da ong ko wa da pynlait nyngkong 465 tylli ki Truck wow lai ki wei hadien won da lai biang sa 655 tylli ki Truck tangwa ini da booh i hei eh ya kiwa khayi neibhah wa boon ym yohlaad ki wow chalan mar cha Bangladesh neidaw wa duna ki kari wa yohbor na u SDO kamtæ ha kani ka kynti da kyntu ya u DC wow chah biang u ya ki kari wow lai ki kam ha ki por wa nachwa.
Hadien ini i yachem neiliang u DC da ong u wa daw elaad biang u wow lai ki kamwa jooh ha ki por nachwa wei daw ekti u ha u SDO ka Amlarem wow pynbait ya ini.
Ha kani ka jooh ka sngi ka seiñ da lai yachem ko leh ya u SDO ka Amlarem wow kyrpaad ya oo wow chimkhia ya ini wei neiliang yong oo leh da pdiang u ya ini i kyrpaad deiwa ong wa ha kani ka tayaw wow wan daw ye u wow pynmih ya ka hukum katkam wa emkaam.
