Hadien wa da chah ktah i chong suk chong saaiñ ha ka jylla ha ki kajiak sngi wa da dep, ka jylla ynne da sdang biang ko wow jai jai, ya ini da pyntip da u Montri Rangbah ka jylla u Conrad Kongal Sangma ha i yachem wa ki laad pathai khubor ynne ka sngi Thohdieñ.
Hawa yatoh wa i jia chah knieh ki tiar siat yong ki pulit kawa da jia ha ka 15 tarik uni u bnai, da ong u wa em kiwa hap wow takit wei wow pyndam kreh leh, deiwa pynrap wa wot tang wow wiar uwi u kuli leh da em ki kyndon ha ka chnat pulit wow pynchitom.
U Montri Rangbah da ong u leh wa hawa yatoh wa i jia ha ka 13 tarik, kammon i jia wa ha iwon i rukom da jia da emkaam ka takit wa bniah bha wow tip kiyi wa leh wei kammon i man, wei hadien ka takit ka sorkar daw ye ko u chim bichaar.
Hajrong i wym booh ya ki bor pulit wow sonteri ha ka 15 tarik uni u bnai, u Conrad da ong u wa ka sorkar ka pyntikna ko wa ki bor pulit ki em ki ha ki thaw wa emkaam, wei da pyntip leh wa neibynta ka 15 tarik, da em i kyrpaad wym booh ya ki CRPF, tangwa da booh du da ki pulit MLP, hanla da em i sñiaw wa ym kwah wow booh ya ki pulit tangwa neiliang ka sorkar da pynche ko wa emkaam wow booh, wow pyntikna wym em i ktah ya i suk i saaiñ.
U Montri Rangbah da kyntait u wa em i ong wa ym chah ya ki pulit ha katai ka sngi, neibhah kiwa boon kiwa yahkhmat chnong wa ki kynhun da pynsñiaw ki wa emkaam ya ki pulit ka jylla ha ki thaw wa emkaam.