Ki ar ngut ki dkhot ka Rotaract Club ka Shishu Mandir, Bengaluru kiwa kynthup ya u Dhanush M na chnong Kadugodi wa u Hemanth Y.B na Yadagondanahalli da thmu ki wow chna ya ka Limca Book of Records wa ka Guinness Book of World Record deiwa yah Bicycle palat 24,000 Km ha ki 180 sngi deiwa lai cha ki 29 tylli ki jylla wa ki Union Territorieska ri India.
Ka thong yong kini ki ar ngut toh wow pynsñiawthnooh hajrong i kylla i chit i bneiñ namo ka Global Warming wa kamjooh leh i puræ puthi heiwa daw yachem ki wa ki paidbah wa ki skur ki thaw puræ wow pynsñiawthooh ya ki hajrong kini ki ar bynta heiwa da mih ki na Vidhan Soudha, Bengaluru ha ka 11 tarik Naiynñiaw 2021.
Ha ka 2 tarik uni u bnai kini ki ar ngut da psiah ki chapoh ka jylla wei ynne ka sngi da poi ki cha Ri-loom Jaiñtia heiwa da pdiang ya ki da u President ka Rotary Club Jowai, u SK Lato ha Orchid Inn, Thadlaskeiñ.
Hawa yaklam wa kini ki ar ngut da khana ki wa da lai luti ki na Bengaluru (Karnataka) cha Andhra Pradesh, Telangana, Odisha, West Bengal, Assam hadooh ha Meghalaya wei da lai luti ki kamwa palat 5,500 Km kattu.
Neiliang u Dhanush da ong u wa neini u mih ki wei daw lai ki cha khappood ka jylla Nagaland, neitæ cha Arunachal Pradesh wei kamtæ ter ter.
Ya kini ki ar ngut da yarap poisa da ka Rotary Bangalore Whitefield Central (Dist.3190) chirup wa ka International Fellowship of Cycling Rotarians (Dist.3190), Shishu Mandir Education Center, Maithri Aqautech Pvt Ltd, wa ka Dr. Durga Prasad Reddy (Cardiothoracic Surgeon, Bangalore).
Ynne ka sngi kini ki ar ngut da yachem ki leh ya ki dkhot ka Jaiñtia Cycle Forum na Jowai heiwa da yaklam da phyllu hajrong i chem wa ka luti wa da lai kini ki ar ngut.
