Ynne ka sngi da man ko kawa sahkynmoo heiwa da soi ya ka soskular Karbi Anglong Agreement ha nongbah New Delhi hei emlang u Montri ki Kaam Pohyung ka ri, u Amit Shah wa u Montri Rangbah ka Assam, u Dr. Himanta Biswa Sarma.
Ha kani ka sngi wa soi ya kani ka soskular yasuk da emlang ki heh ka sorkar pyrdi, u Chief Executive Member ka Karbi Anglong Autonomous Council, u Tuliram Ronghang kiwa mihkhmat ka seiñ Karbi Longri North Cachar Hills Liberation Front KLNLF, People’s Democratic Council of Karbi Longri (PDCK), United People’s Liberation Army (UPLA), Karbi People’s Liberation Tigers (KPLT ) wa kiwi kiwi.
Hadien wa soi ya kani ka soskular yasuk, u Amit Shah da ong u wa kani ka Karbi Anglong Agreement wa da wan pyndem kamwa palat hajar ngut ki dkhot yong ki seiñ kieñ suloi ka thaaiñ Karbi wa Assam deiwa im biang ki kam kiwi tawon ki bru.
Da ong u leh wa kani ka soskular da man ko leh kam kawi na ki thong krehkaam u Montri Rangbahdooh ka ri, u Narendra Modi wow pynman ya ka thaaiñ mihsngi kawa chongsuk wei kawa roi wa paar.
Neiliang u Himanta Biswa Sarma da ong u wa ka sorkar jylla Assam daw booh ko ya ka Karbi Welfare Council wow pait ya i bha i miat ki bru Karbi hapoh wa cha baar yong ka Karbi Anglong Autonomous Council. Kani ka soskular daw pynkup bor chooh ko ya ka Karbi Anglong Autonomous Council ha i wow chna aiñ, i synchaar khadar, i pynkhlan ya ka muna poisa wa kiwi kiwi.