Ynne ka sngi kiwa yahkhmat yong ka EJNC-Sumer Circle, kiwa yahkhmat ka Elaka Sumer, kiwa yahkhmat niam, kiwa yahkhmat chnong ki 4 tylli ki chnong kiwa kynthup ya ka chnong Pala, Khahnar, Kseh wa Muknor deilang wa i synran u Sambormi Lyngdoh, President EJNC-Seiñbei da lai yachem ki ya u MLA ka Sutnga-Saipung Constituency, u Shitlang Pale ha yung sah i yong oo, wei da ekti leh da i thoh deiwa pynsñiaw hajrong i eh yong ki paidbah khamtam hawa yatoh wa i sih palat u sarok wa lai lyngba ki 4 chnong, wei heijooh i por da kyntu leh ya u MLA wow klam neibynta ini i eh wa da hap maad waroh chi kattu i por hapoh ka Yung Dorbar Chna Aiñ ka jylla kawa daw pynman nadooh ka 10 tarik uni u bnai.
Ha i yaklam wa kiwa yahkhmat waphær waphær na ka Elaka Sumer, neiliang u MLA da kular u wow chimkhia ya kani ka phang dawa yong ki iwa da pynsñiaw ha ka dorkhat wa da ekti ha oo, heijooh i por u Shitlang da pynsñiaw u leh yei sñiawkhia wa khroo hajrong i leh mutlop ka sorkar MDA wow wanrah ya i roi i paar cha ki thaaiñ nongkyndong deiwa pynrap leh wa da em ka PMGSY Scheme neibynta uni u sarok tangwa man i iwa phylla won wa hadooh katni ym pu em wa kreh ya utai u sarok wei hawa pyrchang wow kylli na ki Contractor da e daw ki wa em ka khlam COVID-19 kamtæ ym yoh laad de wow phah wareh ya utai u sarok.
Heijooh i por u MLA da kular u ya kiwa yahkhmat waphær waphær na Elaka Sumer wow yarap katwa ye u na ka MLA Scheme ka yong oo yow phah pynchna ya utai u sarok yow lait kari chwa kattu katni por.
Kam wow pynkynmoo wa kiwa chong chnong yong ki 4 tylli ki chnong da jooh ya mih paidbah ki man-u-snem yow pynchna hi ya utai u sarok neibynta wow bha wow biang kattu katni por tangwa chipoi ka aiom slap uni u sarok sih wot u.
