Ka skur North Liberty Higher Secondary School Jowai, ynne ka sngi da pynkup burom ko ya ki khynnah wa poi chakhmat ha ki Exam ka MBOSE ha uni u snem kiwa da yoh psiah ha ki kyrdan wa boon yong ka Top-20 ka SSLC waka Top-10 ka HSSLC.
Kiwa chah pynkup burom kynthup ki ya u Luigi Dalian Paswet uwa da wan wa le ha ka kyrdan Top-10 yong ka Result HSSLC (Science Stream), neitæ u Jayden Magni Pde, uwa wan 14 wa ka Daffodil Langstang kawa wan 16 haka kyrdan Top-20 yong ka Result SSLC.
Ha kani ka sngi neiliang ka skur North Liberty da pdiang burom wei pynkup burom haroh ko ya ki arngut kiwa wan psiah puræ Class XI (Science Stream) ha kani ka skur kiwa da lehbha na kiwi won ki skur ka jylla, kitæ kynthup ya u Wanteibok Pator naka Sawlyngdoh Higher Secondary School Mowkaiaw uwa da wan wa ar haka kyrdan Top-20 SSLC waka Marvellous Shabong na St Joseph’s Girls Higher Secondary School Shillong kawa da wan wa 15 haka Top-20 SSLC.
Cha kini ki soo ngut ki khynroo wa da poi chakhmat haka Result SSLC, ka skur da e sñiawbha ko da ki BYJU’S, Tablet.
“Kani ka BYJU’S, Tablet wym du wa syad dor, tangwa i myntoi wow yoh naka man iwa biang tam neibynta wow yakhun yaki Exam NEET, JEET wei krehkam ko Online kamjooh khlem emkaam Internet,” ong u Principal ka North Liberty, u Richard Uriah hawa e yei klam.
Khana u wa nachwa ya ki khynnah wa wan chakhmat hawa pynkup burom da jooh e sñiawbha leh cha ki da ki Laptop, tangwa i por da nang kylla wei i yoh ya ki Laptop ha kini ki sngi wym em yumut de, kamtæ ha uni u snem da rai wow e noh daka BYJU’S Tablet neibhah kani yarap ko chiboon ya ki khynnah skur wa angnood u man Doctor man Engineer.
Heijooh i por da e khublei wei pyn ehbok ehnasib u ya kini ki khynnah yow nang lehbha chooh chooh ki hei puræ puthi wa chakhmat.