Ka Meghalaya & Greater Shillong Progressive Hawkers & Street Vendors Association (MGSPHSVA), kawa man ka seiñ kiwa chongdai madan, ynne ka sngi ka 6 tarik da pynman ko ya i pynkup burom ya ki khon yong kiwa chnongdai madan kiwa da pyndep ya Class X, XII wa Graduation yong u snem 2021, wei ya kani ka leh burom da pynman ha i thaw pynyieñ kari ha Polo Parking Lot.
Hanla u snem 2020 da man u uwa jynjar ya ki manyung yong kiwa chongdai madan neidaw wa ban ka khlam COVID-19 heiwa kiwa boon na kiwa chongdai toh kiwa em khon kiwa yaleh wa pynkhreh ya ki Exam kam ka SSLC, HSSLC wa ki Graduation heiwa da dooh mynsien bha ki wa da khang ya ki skur wa College neidaw yong ka khlam.
Neiliang yong ka seiñ khlem chong klikti da pyrchang ko wow kyrchaan wow yarap ya kiwa dang lai puræ deiwa e da lai khreh kot (Tuition Clinic) wa kyrpang nadooh u bnai Khonchonglad (Nov) 2020 hadooh u Wisu (Mar) 2021. Lyngba kani ka Tuition Clinic da ye wow yarap wei wow hikai ha ki Subject waphær waphær kam ka Science, Mathematics, English, Social Science wa kiwi kiwi.
Kamtæ da em 41 ngut ki khon yong kiwa chongdai madan kiwa da ye wow pyndep ya ki Exam waphær waphær nadooh ka Class X, XII hadooh Graduation.
Da em leh arngut kwai da yoh ha ka First Division ha ka Bachelor of Computer Applications wa Bachelor of Commerce, kitæ ka Khusina M Marak wa ka Shumilin Rani.
Kiwa da lehbha ha ka Class-X toh ka Celestine M Marak, ka Malveen Malngiang, ka Payal Paul kiwa da yoh palat ya ka 75% wa ka Distinction ha ka Maths wa Science.
Kiwa da lehbha ha ka Class-XII toh ka Jasinta Sangma kawa yoh 77% wa u Merlin Pathaw uwa yoh 68%.
Ha kani ka leh burom da emlang ka Martina Lytan wa u Tariang kiwa man ki Magistrate yong ka East Khasi Hills District. Kini waroh arngut da e yaroh ki ya ki khynroo wa lai puræ kiwa da ye u poi thong wei da kyrkhu leh ya ki wow nangku ki chaphrang.
Ka Isawanda Laloo, Deputy Commissioner ka East Khasi Hills kam ka kongsan ha kani ka sngi tangwa na ki daw wym ye u kiar ym ye ko u wow ya emlang tangwa da phah ko ya ka khubor e khublei wa kyrpang kawa da puræ ka Magistrate kawa ong wa ka DC dap ko dei sñiawkmen wa ka Association kamjooh ya waroh ki lok wa chongdai madan khamtam ya ki khynnah kiwa da yoh wow khait ya u soh i jop i ka yakhun ha ki Exam waphær waphær.
Da yaroh ko leh yei kreh chitom wa i minot ki khynnah deiwa pynchlur ya ki wow pynlai yumut bha ha i puræ puthi yong ki khnang wow nang ku chakhmat. Da e khublei kyrpang ko leh ya ki bei ki pa neibynta i yah luti yong ki wei i pynchlur ki ya ki khon wow yoh ki yei puræ puthi wa biang.
Kiwa sikai yong ka Tuition Clinic leh da ya emlang ki kiwa kyntup ya u Jo Wahlang uwa da pyndep yei puræ Computer (Graduation) na ka Chennai Mathematical Institute, wei da dep puræ Mathematics (Graduation) u na IISER Kolkata. Ka Riban War kawa man ka Doctoral & Research Scholar ha ka Zoology wa u Sanga u Post Graduate ha ka English Literature wei ma u leh u English Lecturer wa u Akash Sil, M.Com.
U Sanga wa u Akash leh man ki khon kiwa chongdai madan.
Ka seiñ kiwa chongdai madan da e khublei kyrpang ki ya kiwa sikai wa ya ka Dorbar Chnong Umsohsun kawa da chah wow pynemkaam ya ka yung dorbar neibynta ka Tuition Clinic.
