Ka Jaintia National Council (JNC) ynne ka sngi hadien wa yoh yei ujor na ki paidbah heiyatoh wa i sih palat u sarok NH-06, ka seiñ lyngba ka Office u Deputy Commissioner, East Jaiñtia Hills District da lai booh ko ya ka ujor yong ka cha u GM Cum Project Director, NHAI, PIU-Shillong Lower Lachumiere neibhah wa da sih cha wa palat u sarok NH-06 hapoh East Jaiñtia Hills District.
Ini i sih palat u sarok NH-06 da pynchitom ko ya ki paidbah wa boon wa lang hei wow lai wow wan cha ki kaam ki jaam yong ki, wei da booh ko leh hei maa ya ki kari wa lai wa wan man-ka-sngi, neibhah i em ki thlu ha kiwa boon ki bynta yong u NH-06 hanla kiwa yah kari u yah ki rap smat du kattu katni donhi, ki thlu won wa em hapyrdi u surok NH-06 ye ki wow wanrah yei ya tyrrah kari, wei ini da booh ko hei maa yei mynsien bru, da ong u Wanshwa S. Suting, President JNC.
Man ko iyi iyi wa phylla wow yoo wa wot u sarok ha chnong Khliehriat kawa man leh ka Headquarter yong ka East Jaiñtia Hills tangwa u sarok won man u uwa da sih hadooh katni, heipor wa slap dap da ka um suda heipor wa chit sngi dap sa du i pum pum, i laphooh wei thlu hadooh wa da chem chitom ki kari wow lai wow wan wei hadooh katwon won cha kiwi ki ar ki chnong, ong u Rimiki Dkhar, President JNC Khliehriat Circle.
Ka JNC ha ka ujor yong ka da dawa ko na u GM cum Project Director NHAI wa toh u man ka NHAI kawa stiñ wa smat wow pynchna wut wut ya u sarok NH-06 kamwa smat wa stiñ ki u chim pisa na ki kari ha ki Toll Gate khnang wow man i myntoi ya ki paidbah wa boon wa lang pynkut, u Symboh B. Sumer, General Secretary JNC-KC.