U MLA ka Congress na Mawlai Constituency, u Process T Sawkmie da ong u wa i chah siat yap yong u Cherish Thangkhiew daw man ko ka phang wa chit bha wow yatai ha ka Dorbar kawa daw sdang nadooh ka 10 tarik uni u bnai, lada u Montri Rangbah ka jylla ym ye u wow chimkhia chwa wow sdang ka dorbar yei dawa ki paidbah ‘Ka Sur ki Nong Mawlai’.
Hawa klam ynne ka sngi, u Sawkmie da kyntu u leh ya u Montri Rangbah ka jylla, u Conrad K Sangma wow sñiawthooh yei emkaam wow chimkhia ya kani ka phang neibhah wot da u Lat ka jylla, u Satya Pal Malik da klam che u wa kam ini i jia ym toh u jia i.
U MLA ka Mawlai da ong u leh wa u Montri Rangbah ym toh u pyndooh burom u ya ka sorkar hapoh ka yung dorbar, khamtam hawa yatoh wa i dawa yong ‘Ka Sur ki Nong Mawlai’ kiwa da ekti dei thoh cha ki 35 ngut ki MLA Khasi-Jaiñtia wow paan kyrchaan hawa yatoh wa i dawa behkreh chipor ya ki heh pulit wa emkti wow siat yap ya uwa yahkhmat warim ka HNLC ha ka 13 tarik u Naisaphra.
Da ong u wa i mutlop ka sorkar wow beh kreh chwa ya ki pulit kamwa da dawa da ki paidbah daw nang pynjrong chooh chooh ya i yakhih, wei daw pteiñ leh i klam pyrchah ya ka sorkar na ki paidbah.
Hawa yatoh wa i ong ka sorkar wow yang chwa ya ka bui (Report) yong ka Judicial Inquiry hajrong itai i jia, u MLA ka Congress da ong u wa ymtoh waroh i jia wa hap wow yang ya ka takit, tangwa kam ya iwa jia ha ka 13 tarik wa da dooh noh yei mynsien bru ka sorkar toh u chim ko ya ka luti lai khlem da yang ya i takit.
