Deiwa em 1061 ngut kiwa dang yoh COVID-19 ha Mizoram ynne ka 9 tarik, kiwa dang chah ktah ha Mizoram da tam ki 12,000 ngut deiwa em 12,304 ngut iwa da pynman ya ka Mizoram kam ka jylla ha ka thaaiñ Northeast wa kawa chah ktah dooh wei da man ko ka jylla wa 6 hapoh India kawa boon dooh kiwa dang chah ktah.
Ha kani ka tayaw deilang wa ynne ka sngi kiwa yoh COVID-19 ha Mizoram da em ki palat 1000 ngut la le sien heiwa ha ka 8 tarik da em 1214 ngut wa ha ka 7 tarik 1468 ngut kiwa yoh.
Waroh kiwa da dep yoh COVID-19 ha Mizoram da em ki 67,971 ngut heiwa na kini, 34,407 ngut toh ki chynrang wa 33,564 ngut ki kynthai heiwa kiwa boon kiwa dang yoh toh ha kani ka la-ær wa ar ka khlam. Ka Mizoram heipor wa wan ka la-ær wa nyngkong da man ko kawi na ki jylla wa duna dooh kiwa dang chah ktah hapoh ka ri.
Tangwa ka Mizoram won toh kawa duna dooh na ki jylla ka thaaiñ North East wa em kiwa yap na ka khlam kiwa em 229 ngut wei kiwa boon dooh ha Assam 5723 ngut.
Kiwa dang chah ktah kiwa boon dooh toh ha Aizawl District (7624), Kolasib District (900) wa ha Lunglei District (808).
Ynne ka sngi kiwa chah ktah na kiwa chah Test da em ki 10.13% kawa tip leh kam ka Positivity Rate.
Heiyatoh wa i e tika ha Mizoram da dep wow e la 9,37,162 sien heiwa na kini, 6,61,66 ngut toh kiwa da yoh yei tika chisien wa 2,75,996 ngut kiwa da yoh la arsien.
I boon kiwa dang chah ktah ha ki jylla ka thaaiñ Northeast man ki kamni:
Mizoram (12,304), Assam (6298), Manipur (3164), Meghalaya (1970), Sikkim (862), Nagaland (707), Tripura (676) wa ha Arunachal Pradesh (617).
Ki jylla wa boon dooh kiwa dang chah ktah hapoh ka ri toh ha Kerala (2,40,037), Maharashtra (51,419), Karnataka (17,085), Tamil Nadu (16,180), Andhra Pradesh (14,510), Mizoram (12,304), West Bengal (8,288), Odisha (6,332), Assam (6,298) wa ha Telangana (5,497).
