Da pynman yei pynsñiawthooh ya ka aiñ yow lait u chah ieh ki bei ki pa ha ki khon

Ka yung krehkaam ka District Social Welfare Officer, West Jaiñtia Hills da pynman ko ya ka yalang pynsñiawthooh hajrong ka aiñ wow pyndap pynbiang ya ki bei ki pa wa ki bru wa da heh rta (Maintenance and Welfare of Parents and Senior Citizens Act) ynne ka sngi ha District Library Auditorium.  

Ka J. Synnah, District Welfare Officer hawa e yei klam wai phang da pyntip ko wa kani ka aiñ da phah ko wa ki khon toh u bahkhlieh wow pyndap pynbiang ya ki bei ki pa lane ya kiwa da heh rta ki wym ye de wow pait pyn ya idæ. Kani ka aiñ The Maintenance and Welfare of Parents and Senior Citizens Act 2007 da tipmit ko yei hok yong kiwa da heh rta wow im ki deiwa em burom.

Katkam ka yukheiñ, ha India ki bru wa da heh rta da antaad wa daw boon bha ki ha ki snem wow wan wei iwi na ki daw toh wa da miat ka rukom sumaar sukhær tangwa ym em won mut wa man ki kiwa chait wa khiah wei da maad ki leh ya kiwa boon ki eh wa yatoh wa ka poisa poilaiñ wa iwa emkaam ki hei chait i khiah.

Ka Synnah da pynkynmoo ko leh wa ka sorkar jylla lyngba ka DSWO da e yarap ko da ki dawai wa ka poisa yow summar ya kitu kiwa da em 60 snem ki kynthai wa 65 snem ki chynrang kiwa em hapoh ka Below Poverty Line deiwa e T. 2200 samen chi snem.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka K. Lamar, Rtd. Deputy Director, Social Welfare da khana ko chaphang ki thong kani ka Scheme, deiwa ong wa ka thong wa kongsan toh wow pynbha pynmiat yei rukom im kiwa da heh rta deiwa pynbiang ya i thaw sah, i baam, i sumaar wa kiwi kiwi de. Da pynchlur ko leh ya ki NGO wow wan ki chakhmat wow wai da ka thaw wow pait ya kiwa da heh rta kam ki Day Care Facility hapoh ka District. Kani ka Scheme daw yarap ko leh ya ki bei ki pa wa kiwa da heh rta yow lait ki wow chah ieh ha ki khon yong ki.

U Dr. K.C. Ajar, District Medical Officer, Jowai da pyntip u wa hapoh ka National Programme for Health Care of Elderly, da pynbiang ya ki thaw sumaar kiwa neibynta kiwa da heh rta.

Da e buit u leh ya kiwa pait ya kiwa da heh rta wow sumaar chwa ki ya idæ khamtam manda pait ki ya kiwa da heh rta deiwa bood ya ki kyndon COVID-19 wow yada ya idæ kamjooh ya kiwi.

U President ka Synjuk Waheh Chnong, Jowai u Alan Niangti da klam u hajrong i kamraam yong ki Dorbar Chnong neibynta kiwa da heh rta ka imlang sahlang.