Uwa yahkhmat ka Liang Pyrchah uwa man leh u Montri Rangbah warim ka jylla, u Dr. Mukul Sangma da ong u wa da toh u ujor da ka mukotduma hajrong i pynbaad baam-tooh heiyatoh wa i pynkrehkaam ya ki Smart Meter da ka Meghalaya Energy Corporation Limited.
Da ong u wa i kynrum kynram hapoh ka chnat bordiñ ka jylla da pteiñ i wei i mih pyrthai ha ki laad pathai khubor awjan man-ka-sngi, ym du ha kawi ka Project krehkaam tangwa ha kiwa boon tylli wei ymtoh de du i pynbaad tangwa da em leh iyi iyi cha lyndet ya iwa da toh u phah takit.
U Dr. Mukul da ong u leh wa hajrong ini i mih i pynbaad baam-tooh khamtam ya ki Smart Meter iwa da wanrah ya i doohnong wa khroo ya ka jylla waroh kawi, ka sorkar wa ki bor wa pait ya ini toh u chimkhia ki ya ini i chah pynbaad wei emkaam wow ujor mukotduma noh katkam ki kyndon ka aiñ.
Da pynrap u leh wa ka Asian Development Bank kawa da e poisa neibynta ki project da toh u ujor ko wow pynyoo wa ym emkti ko hei chah pynbaad.
