Ha ka 11 tarik uni u bnai da yoh wow pynlait paidbah ya ka YouTube Channel ka P.K@28 Production ha ka yalang wa pynman ha Jowai, heiwa chwa wow pynlait paidbah ya kani ka Channel kawa daw man leh ka rynsan wow pynman ya ka yakob chaad Online, da yoh ya i ngooh Blai na u Dameki Kma heiwa ya ka yalang da pynlai da u O. L. Tariang.
U Paila Kordor Lyngkot hawa klam heiyatoh wa ini i pynlait paidbah ya kani ka Channel da ong u wa i thmu toh yow pynku yei sap i phong yong ki khon khynroo yong ka Ri Khasi wa Jaiñtia deiwa pynrap u wa deiwa em kani ka Channel da yooluti wa kiwa boon ki khon khynroo khyllood daw yoh laad ki wow pynyoo i sap i phong yong ki, kam hei chaad, i rwai, ki kaam ak phlim wa kiwi kiwi. Kamjooh leh wow yarap pynku ya ka imlang sahlang ha waroh ki liang.
U Dapoi Laloo uwa man u symbood kongsan hawa klam da kitbok kitrwiang u ya ka Channel wow man ko ka Channel kawa dang ku khamtam kammon wow yarap ya kiwa boon ki khon khynroo khyllood kiwa em sakhiat yei sap i phong yow yoo ka pyrthai ki lyngba kani ka Channel.
U Tellme Phawa u waheh chnong ka chnong Sabah, uwa man leh kam u Joint Secretary ka Synjuk ki Waheh Chnong yong ka Ri-Loom Jaiñtia hawa klam kam u kongsan da e bor e mynsien u ya ki tre yong kani ka Channel wow kreh chitom ki doh wa mynsien yow ye ki u chakri rap bha ya ki khon khynroo khyllood yong ka ri lyngba kani ka Channel.
Ha kani ka yalang da yoh leh yei rwai na uwi na ki khynroo u Rapmiki Pohti wa u Shaphrang Pajuh.
Kiwi tawan kiwa klam toh u Wil Dkhar, u Never Care Passah, ka Nidaialam Dkhar wa u Shaphrang Pajuh.
Ya ki kyntien e khublei da e da ka Bynta DB Lyngdoh.
Puræ leh: Daw pynman ya ka yakob chaad Online da ka P.K@28 Production