U Montri Rangbah ka jylla, u Conrad K Sangma, ynne da booh mooyurim u ya ka Khadi Plaza/Market Complex ha Barik, Shillong hei emlang u Chairman, Meghalaya Khadi and Village Industries Board (MKVIB), u Gavin Mylliem.
Hawa e yei klam neiliang u Conrad da ong u wa ka sorkar jylla da yaleh bait ko wow pynchlur ya kiwa seiñ kreh wa khian namo ki Nano & Micro Entrepreneurs wow ye u pynemdor ya ki mar yong ki.
Da ong u wa i duna i em ki dukan wa ki thaw pynyoorong kam ki Studio wa ki Emporium wei i duna i yatoh wa ki yaw ha ki thaw sor da pynartatien ki ya kiwa seiñ khih wa ki bru chemsap kiwa ymye u pynwandur ya ki kaam yong ki tangwa i em kam kani ka thaw (Plaza) daw yarap ko ya ki lyngba i wan ki bru wa uiñke suwari.
Da kyrmen skem u wa kani ka Khadi Plaza daw yarap bha ko ya ki warep kamjooh kiwa em sap wow pynyoo rong ya iwa ki ye ki wow leh wei wa kiwa da chna ki.
Neiliang u Gavin Mylliem da ong u wa manda pyndep ya ini i yung daw yarap i wow kyntu kynrong ya ka yarong poisa ka MKVIB wei ya kani ka Project da kreh da ka NEC, ka Department of Commerce and Industries, MIDC wa MKVIB.
I dor yong kani ka project man i T. 2,73,76,685 wei da e poisa da ka NEC wei u pynkreh ya ka da ka MIDC Ltd heiwa kani ka yung u man ko soo mala (G+3 Storey Building) heiwa daw booh ya ki mar wa ha rukom nadooh ki tiar wa da thaaiñ, Um-ngap, ki marbaam wa kiwi kiwi.
