U MLA ka Umroi u George Lyngdoh ynne ka sngi da wanrah u ya ka Zero Hour Notice hapoh ka dorbar hajrong i chah dat chah tba kti ki Khasi, Jaiñtia wa Garo wa em ha Bangladesh heiwa da pynbaad leh wa ki bru ka chnat Forest da pynchlur ki ya ki bru wow pyndik ya ki Khasi wa rep kwai rep pathi ha Moulvibazar District heiwa ki thaw rep da chah tympra ki wei ini daw ktah ko leh yei imja yong ki.
Heiwa ha ka 2 tarik uni u bnai, da em kamwa 500 ngut na kini ki bru da hap ki wow mih paidbah yow pynsñiaw cha ki bor sorkar ya ini wa jia ya ki.
U George da ong u wa hanla katni kini ki bru da em ki cha kiwi ki ri, dang man hi ki ki payu para yong i kamtæ da kyntu ya ka sorkar jylla kamjooh ya ka ri Bangladesh wow yada yei hok kini ki khian paaid ka ri yong ki. Wei neiliang ka sorkar jylla wow jied ko ya ki MLA wow lai cha Bangladesh yow pynyoo yei kyrchaan cha ki bru yong i wei wow yaklam wa ki bor sorkar ka Bangladesh.
Hawa e jubab, u Montri Rangbah ka jylla, u Conrad Sangma da ong u wa katkam ka khubor wa da mih, ha ka 24-08-21 da em 28,000 tylli ki dieñ kwai ki Khasi wa Garo da chah tympra ki, wei ha ka 27-08-21 da em le ngut ki khynroo Khasi kiwa da chah dat heipor wa liwan ki cha yung.
Kamtæ da ong u wa ini da jia i na i por cha i por heiwa da dep wow phah dorkhat cha ka yung krehkaam ka Prime Minister ka Bangladesh ha ka 06-06-21 da uwi u bru wa kreh mon sñiawbha wei kam ka sorkar jylla da phah ko leh ya kani ka dorkhat cha Ministry of External Affairs ka sorkar India yow leh ki yeiwa emkaam wei na ki por cha ki por da booddien ya ini i kaam.
