Ki MLA ka Congress kiwa em ha ka liang pyrchah ynne ka sngi khaddooh ka Dorbar Synrai da beiñ joor ki ya ka sorkar MDA hajrong i tkoh krehkaam yong ka ha ka jylla.
Hawa yatai ha ka ‘Short Duration Discussion’ u Zenith Sangma da ong u wa nadooh wa ka sorkar MDA da chimkti ko yei synchaar ha u snem 2018, da mih chiboon i chah ktah hei chongsuk hapoh ka jylla, heiwa da mih i kynaad ha Them Metor wei ka sorkar da pynkrehkaam ko da ka Curfew hadooh 48 sngi wei da khang ko leh ya ka Mobile Internet, iwa ympu jooh jia ha ki por wa dadep, deiwa kdaw leh wa ha kani ka sorkar da em chiboon ki kaam tyngkheiñ aiñ ha i khayi mooyong wa i ku ki kaam ki seiñ kieñ suloi.
Neiliang u Charles Pyngrope da klam u hajrong i khynñia ka nongbah Shillong wei i wymye wow pynheh ya ki sarok deiwa e daw bait wa wan ka khlam COVID-19.
Neiliang u Kimfa S Marbaniang da wanrah u ya ki kaam wa yatoh wa i wym mano ka sorkar hajrong i dawa ka Sur Ki Nong Mawlai wow beh kreh chipor ya ki pulit wa emkti ha i jia yong ka step 13 Naisaphra heiwa da kyntu u ya ka sorkar wa ymtoh u kyntait ko ya ki sur paidbah.
U Shitlang Pale da kdaw u yei pyrchah hajrong i roi ki karkhana Coke ha Elaka Sutnga neibhah ini ktah i ya i chait i khiah ki paidbah khamtam ki khynnah wa ki khonboo wei da dawa u wow pynsangeh noh ya i kreh yong ki.
U Himalaya Muktan Shangpliang da kylli u ya ka sorkar hajrong ka Resolution Inner Line Permit, deiwa kdaw wa ka sorkar da rem (Fail) ko neibhah wa hei sakhiat da toh u booddien ko deiwa khor ya ini wa ka sorkar India, khamtam heiyatoh wa ka sorkar India ka wym burom de ya i rai ka yung dorbar ka jylla.
