Hadien wa yap uwi u khynnah skur ka Loyola School wa em ha Dawagre, Williamnagar, East Garo Hills iwa da jia ynnin ka sngi heiwa da chah ban u ha u dieñ wa phah rah ha oo wa kiwi de ki khynnah skur da kiwa pynlai ya ka skur heiwa uni u khynnah toh uwa dang 14 snem uwa lai Class IX ha kani ka skur.
Neiliang ka Jesuit Education Council da pyntip ko wa da behkreh (Indefinite Suspension) ya u Principal ka skur uwa tip kam u Fr. Melwyn Fernandes SJ heiwa da phah ki leh wow pynman ya ka takit yow chemdien yei daw wa da jia ini i kaam wa sñiawsih.
U Secretary for Jesuit Education da ong u wa ini i khlaad uni u khynnah skur toh iwa sñiawsih bha wei ka Council leh ym chong ngiah ko kat wym pu tip yeiwa jia sakhiat, da phah u leh ya ka khubor sñiawlem cha kiwa hayung hasem uwa khlaad.
Neiliang u DC ka East Garo Hills leh da phah pynman u da ka takit wow leh da ki Magistrate deiwa kyntu leh ya ki paidbah wow man kiwa jai jai hadien wa da hap yut rieh u Principal chapoh ka Police Station.
Kani ka skur toh ka pynlai da ka Jesuit Missionary wei man ko leh kawa pawnaam bha ha East Garo Hills.
Heiyatoh wa i jia ynnin ka sngi, ki khynnah Class IX da phah ya ki wow ngiat pyntyllung ya ki dieñ ha i thaw wa daw wan pynmadan da ka pooh chi-loom yow suk ko wow lai luti. Ki khynnah wa em 5 ngut kiwa em soo ngut na chiliang wa uwi na chiliang heithaw wow ngiat ya kini ki dieñ, da rah da kynrong pathan ki ya u dieñ yow noh oo wei heini i por da chah ban uwi uwa rah wa em samen na chiliang wei hadien wa da yoo wa mih snam u na khmut wa na ktien da pynkit ya oo wut wut cha Hospital tangwa da pynbna da ki Doctor wa da khlaad u kat wow poi cha Hospital.
Kiwa boon da beiñ ki ya kani ka skur wa pynemkaam ko da ki khynnah wow leh ya ini i kaam heiwa pyn da u Principal wa khut ya kini ki khynnah wow wan chakhmat kiwa bien wow leh ya ini i kaam.
