U Montri ki kaam pohyung ka jylla, u Lahkmen Rymbui da ong u wa i takit ya u Joannes Lamare wa ki lok yong oo da man i iwa lai bait wei da kyntait u wow klam iwon iwon hajrong kani ka phang, deiwa pynrap wa toh i kaamram ki pulit wow yada na kiwon kiwon ki kaam pyrchah aiñ ha ka jylla.
Kam wow pynkynmoo heini, ya u Joannes Lamare wa ki 3 ngut ki lok u da chah kem ki ha i step ka 18 tarik uni u bnai na Mawlai hajrong i chah pynbaad wa da lai paan yarap ki na ka NSCN (IM) wow chna ya kawi ka seiñ kieñ suloi wa thymme hapoh ka jylla.
Heijooh i por u Montri da ong u wa ki pulit da paitsiar bha ki khnang wow wanrah yei chngaaiñ wa i suk i saaiñ ha ka jylla. Hajrong i yada ya ki khynroo nei wow lai psiah man dkhot ki wa ki seiñ, u Lahkmen da ong u wa ym toh i kaamram du yong ki pulit wow pynlait na kam itæ wei toh i kaamram yong waroh kiwa chong chnong wow pynbait ya iwon iwon iwa ye u ktah ya ka jylla.
Hajrong i sdang khai-im ki kaam damok ha Ri-loom Garo, u Lahkmen da ong u wa hanla ki pulit da leh ki yei kaamram, tangwa emkaam leh ya i krehlang ki paidbah wei kamwa man katni ki paidbah wan ki chaphrang wow pyntip cha ki pulit lada em kiwon kiwon ki kaam wa suba ki wa ye u ktah ya i chongsuk.
