U Montri ka chnat Health & Family Welfare, u James P. K. Sangma da lai pait u ya boon tylli ki thaw sumaar ha kylleiñ ka jylla ynne ka sngi, wei i thmu yong ini i lai pait toh yow tip yeiwa emkaam wei wow pynbha ya ka chnat yow ye u chimkhia.
Ha ini i lai yong oo, da synraan da u Alvin Sawkmie uwa man u MDC ka Mawsynram Constituency deilang wa u President ka NPP Mawsynram Block wa kiwi de ki dkhot ka National People’s Party na kani hi ka Block.
U James Sangma da ong u, “I chait i khiah toh kawa emkaam kawa yatoh leh wa i bha ka imlang sahlang. Wei ini toh i sneiñ wa ka pyrthai da maad wei chem chitom khamtam ha i por ka khlam COVID-19.”
Da pyntip leh ya u James Sangma ya i wym biang ki Doctor, Nurse, ki sahep wa kiwi de kiwa emkaam wa jhan ha PHC ha Mawsynram. Wei hadien wa u Montri da yoh sñiaw u ya ini i eh waroh, da kular u ya kiwa chong chnong wei kamjooh leh ya ki wakreh ka chnat wa daw chimkhia ya ini i kaam yow wanrah yei kylla wa i bha ha i por wa biang.
Ha ini i lai pait, u Montri da yachem u wa kiwa boon kiwa kitkaam ka NPP kam ka chnat Sawsymper kiwa da e ya ka dorkhat wow pynku kyrdan ya ka Sawsymper Sub-Centre cha ka Primary Health Centre (PHC). Ki dkhot ka NPP chnat Dangar leh da e ya ka dorkhat wow pynbha ya ka Dangar PHC wei ha i jooh i por wow pynku kyrdan ya kani ka PHC cha ka Community Health Centre (CHC).
U James da pynrap u, “Nga da yoh O ya i kyrpaad na kiwa kitkaam ka NPP yong ka chnat Sawsymper wa ka chnat Dangar wow pynku kyrdan ya kini ki thaw sumaar khnang yow ye u sumaar rap bha ya ki paidbah. I kyrpaad toh kiwa sñiaw yahaap wei kiwa man sakhiat wei neiliang ka chnat u yaleh i wow wanrah ya ini i kylla wa emkaam ha i por wa biang”.
Ha ka jooh ka sngi, u Montri da lai u leh cha ka Lawbah PHC yow pait yei kreh wa da lai bait. U Montri da pynsñiaw u yei hun ya i rukom pynkreh ya kani ka PHC wei da kular u wow pynkrehkaam noh ya ka mar ya dep khnang wow ye u pynbiang ya iwa emkaam ki paidbah kani ka thaaiñ.
Khaddooh, u James Sangma da lai pait u ya ka Ryngku PHC yow yachem wa ki wakreh yow ap yeiwa maad ki nei por chei por wei da kular u wa ka chnat daw yaleh ko katwa ye wow pyndooh yeiwa pynthut ya i rukom krehkaam kini ki thaw sumaar.
U Montri da pyntikna u wa ka sorkar jylla daw kreh ko doh wa mynsien yow pyndooh jait yei jynjar wei chitom ki paidbah hawa yatoh wa i chait i khiah wei wow yaleh katwa ye wa waroh kiwa chong chnong ka jylla u yoh ki yei sumaar wa paka.
