Ka la-ær i kyrmen neibynta i pynbait pood heiyatoh waka Block-1 da nangbeh nangbeh ko heiwa ki MDC yong ka Jaiñtia Hills Autonomous District Council (JHADC) kiwa haap ha ki Constituency wa tyngkhooh khappood wa kynthup ya u Aiborlang Shadap naka Mukroh Barato Constituency, u Dawan Lyngdoh naka Mynsngad Khanduli Constituency wa u Habahun Dkhar naka Saphai Constituency da yakrehlang ki neibynta u wanrah i pynsñiawthooh yumut ya ki paidbah wa sah ha ki thaw kajia khappood ha Ri-loom Jaiñtia hi waroh kawi yow man kiwa yatylli.
Ha ka yalang wa kyrpang kini ki MDC wa da pynman haka 28 tarik uni u bnai ha kamra krehkaam u MDC ka Mynsngad Khanduli ha JHADC, da emlang leh ki le ngut ki Dolloi wa kynthup ya u Chawas Lyngdoh, Dolloi ka Elaka Raliang, u Copiousness Daw, Dolloi ka Elaka Nongjngi wa u Dolloi ka Elaka Chiliang Myntang, neitæ u Woh, M.M. Thaiang Secretary ka Labang Nangphyllut Pangam Raliang Council (LNPC), u Chandame Sungoh, Chairman yong ka Hynñiewtrep Border Disputed Redressal Forum (HBDRF). Wei waroh kiwa embynta ha kani ka yalang da ya pachat yumut kylliang ki.
Katkam i pyntip u Chandame Sungoh, da ong u ki rai wada chim ha kani ka sngi toh yow pyrchah joor ya ka pynbna Notification ka Assam No. TAD/ R/31/50/151 Dated 13th April 1951 waka Assam Re-organization (Meghalaya) Act 1969-1972. Kawa da pynkhlaad yabor yaka Elaka Labang Nangphyllut Pangam Raliang na ka Hima Jaiñtia.
Da rai u yakrehlang hapyrdi ki Dolloi, ki MDC yow pynsmat i pynyoh Patta næ Land Holding ya ki paaid wa chong chnong ha ki thaaiñ khappood.
Da rai u booddien ya kani ka kaam deilang wa ka JHADC katkam wada mynjur haka rai (Resolution) ka dorbar wa dang dep man.
Da rai u pynbiang ya ki Map, ki pyrtuid chnong, pyrtuid ki thaw wa hap hei pait ki le Dolloi (ka Elaka Raliang, Elaka Shiliang Myntang wa Elaka Nongjngi) wa ka Elaka Labang Nangphyllut kawa da chah pyndam ha ki Karbi.
Neitæ da rai leh u pynman yaka yalang paidbah ha ki artylli ki chnong ha Lapangap wa ha Khanduli neibynta u wanrah i ya sñiawthooh yumut wa i yakrehlang hapyrdi ki chnong khappood wa kamjooh kiwa sah hapoh Block-1.
