Ka Khun Hynniewtrep National Awakening Movement (KHNAM) da pynbna ko wow sai ya u kyrtong neibynta ka Election chiteiñ samoi na 13-Mawryngkneng Constituency kawa daw pynman ha ka 30 tarik uni u bnai.
U President ka KHNAM uwa man leh u MLA ka North Shillong, u Adelbert Nongrum ynne ka sngi da pynbna u yei pyrtuid u Esron Marwein kam u kyrtong na Mawryngkneng, wei neiliang u President yong ka KHNAM da pdiang burom u leh ya u Esron cha ka Party deiwa e kti wei pynkup ya ka lama yong ka seiñ.
U Adelbert da ong u wa hadien wa da ya syllok wei da ye u sñiawthooh ya ka yurim yong ka KHNAM, da mynjur wow pynyakhun ha ka Election, khamtam hawa ka ri wa ka jaitbru da nang synjor katwa dang mih ki sngi, deiwa pynrap wa ka jylla da lai ko cha ka 50 snem tangwa ym em iyi iyi i roi i paar wa sakhiat.
Hawa yatoh wa ka Mawphlang Constituency, neiliang u Adelbert da ong u wa i klam ya u kyrtong da lai ko wei hadien wa da pyndep ya iwa emkaam daw pynbna noh ha ki kajiak sngi wow wan.
Kam wow pynkynmoo wa u Esron Marwein toh u wakreh mon sñiawbha uwa kreh bha neibynta ki warep, uwa man leh u President warim yong ka seiñ PDF na Mawryngkneng wei kamjooh da jooh man u leh u General Secretary warim ka National People’s Youth Front (NPYF) kawa man ka chnat khynroo ka NPP.
