October 4, 2021
Advertisement
Advertisement
Ka Meghalaya da rem ko ha ka yalehke wa san wei khaddooh yong ka ha Vinoo Mankad Trophy pyrchah ya ka Sikkim da 46 Run kawa pynman ha Ranchi ynne ka sngi.
Ka Meghalaya da yooluti wow jop ko ya ka yalehke hadien wa ye u pynhiar ya ka Sikkim cha 16/6 hadien wa ka Sikkim da jop ko ya ka kylla khlem wei da jied ko wow Bat nyngkong. Tangwa ka Sikkim da ye ko wow yakhun yow poi cha 155 All Out na ki 44.5 Over hadien wa da neh u Wicket wa ynñiaw deiwa kamai 115 Run.
U PM Santosh (2/21) wa u Bharat Gurung (2/25) da yoh ki wow pynhaap ya ki Wicket kiwa nakhmat katwa u Gavineal Marpna (1/25) da ye u wow pynkut ya ka kamai neibynta ka Wicket wa ynñiaw. Hadien wa khlem yoh wow yaleh ya kiwa boon ki yalehke, u Wankitlang Nongpluh da yohlaad u wow yaleh ynne ka sngi heiwa da bol da yoh u 2/36 deiwa yoh leh u pynhaap ya uwa kamai dooh ya ka Sikkim u Ankur (76).
Hawa kdong yei thong, ka Meghalaya da emkaam ko 3 Run chi Over iwa ye ko u leh tangwa ym neh slem kiwa Bat.
U Captain, Kevin Christopher, toh uwa da ye u lehbha da ka Bat uwa da yoh 41 Run khlem haap tangwa ym yoh u ya kiwa kyrchaan lang ya oo. U Marpna da neh u 40 bol yow kamai 14 Run tangwa ym dap i yow jop heiwa ka Meghalaya da haap lut ki Wicket ko deiwa kamai 109 Run na ki 35.3 Over.
Kamtæ na ki 5 tylli ki yalehke ka Meghalaya, da jop chisien, rem le sien wei kawi khlem yoh u yaleh neidaw wa slap.
