U heh ka seiñ National People’s Party (NPP), uwa man leh u Symbood Montri Rangbah ka jylla, u Prestone Tynsong da ong u, ham elaad ya u thlen wow baam ya ka jait yong i, deiwa pynrap wa ki bru wa khroo nachwa jooh ong ki wa u thlen baam u du ya ki Khasi. Ya ini da ong u hajrong i chah maham ki wakreh ka Party ha ka seiñ Hynniewtrep National Liberation Council.
Hawa klam ha ka yalang ynne ka sngi ha Mawphlang, u Prestone da ong u wa em kiwa maham ya ki wakreh ka NPP deiwa kylli ya kitæ ki bru neiyi i daw wym sarong ki wa u National President toh u Conrad Sangma, wei ym sñiaw sarong phi wa u Prestone Tynsong toh u National Vice President.
Da ong u wa nadooh i step da sñiaw na kiwa boon wa tieñ ki, tangwa da ong u ya ki wa ymtoh u tieñ ki wei wow lai chaphrang wow chakri ya ka jaitbru ya ki paidbah kiwa khian paaid ha ka ri waroh kawi.
Ha kani ka sngi u heh ka NPP da khut u ya ki paidbah wow psiah cha ka Party neibhah wa ka NPP toh kawa da tipmit ha waroh kawi ka ri India, deiwa ong leh wa klam u yeini da i mynsien wa khia deiwa kyntu leh wow yieñ tylli ki iwi kam ka jaitbru wa ka jylla.
U Prestone da ong chooh chooh u wa yoo kamwa em ki wym kwah u pait wa ka Party na Meghalaya u yoh ko u yimpa lang ha ka saiñ pyrthai ha Delhi.
