Ka Sutnga Pohshnong Sports & Games ynne ka sngi da sdang ko ya ka lympung yaleh bol (Knockout Tournament) yong ka deiwa pynman chwa da ka yalang wa tbian heiwa da yoh ya ki ktien pdiang burom na u Secretary Dong, u Haoo Pala uwa man kam u chongknor ha katai ka yalang uwa da pdiang sñiawbha leh ya waroh ki paidbah wa wan, kiwa chah khut sñiawbha waroh kamjooh ya waroh 32 tylli ki Team kiwa da wan chimbynta khamtam ya kiwa wan wow sdang ya kani ka lympung kitæ ka Jarain SC waka Wapung Umchangpet SC.
Da yoh leh yei klam na u MDC ka thaaiñ u Seiborlang Shadap, na u symbood kongsan, u Kmenlang Phawa uwa na Wapung neitæ na u kongsan, u Siril Suja wei da yoh ya ki kyntien e khublei na u Chirong Sutnga heiwa da ah leh ya u Ribbon kam i dak wow sdang ya ka Tournament.
Haka yalehke hadooh wa kut i por da thap ki mar chi kool heiwa da pynman da ka yachut Tie-Breaker heiwa da yachut mar 11 sien tangwa kattæ leh ym ye wow yoh ya kiwa jop.
Kamtæ da leh da ka kylla khlem heiwa ka nasib da lai ko cha ka Wapung Umchangpet kam kawa jop.
