U kyrtong ka Congress ha ka Election chiteiñ samoi na Mawryngkneng, u Highlander Kharmalki da ong u wa i mih ki khubor hajrong i yaphær yumut u President ka Meghalaya Pradesh Congress Committee, u Vincent H Pala wa uwa yahkhmat ka Congress Legislature Party (CLP), u Dr. Mukul Sangma ym em yatoh iyi iyi leh wa ka Election ha Mawryngkneng, tangwa da ong u wa i mih yong kiwa yahkhmat ka Party wow kyrchaan ya uwi won u kyrtong daw e myntoi ko ya ka Congress ha Mawryngkneng.
U Highlander uwa da lai wow thap pyrtuid ynne ka sngi neibynta ka Election chiteiñ samoi kawa daw man ha ka 30 tarik uni u bnai, wei i yakhun man bait ko pyrchah wa u kyrtong ka NPP, u Pyniaid Sing Syiem uwa man leh u MDC ka Sohryngkham.
Hawa kylli hajrong i rai ka ka UDP wow kyrchaan ya u kyrtong ka NPP ha Mawryngkneng, u Kharmalki da ong u wa oo jooh man u kam u kyrtong yong ka UDP wa ka PDF, wei kiwa boon kiwa kyrchaan yong kitai ki Party kamwa 75% em ki wa ka Congress ha Mawryngkneng.
Hawa kylli chooh chooh ya ki phang krehkaam, u kyrtong ka Congress da ong u wa ha ka jylla da sakhi wa i rukom krehkaam wym yatoh de wa ka juk kawa katni aw jan waroh ki chnat krehkaam ka sorkar.
