Ki ar ngut ki kyrtong ka National People’s Party kiwa yakhun ya ka Election chiteiñ samoi na Mawryngkneng u Pyniaid S Syiem wa na Mawphlang u Lamphrang Blah da lai ki wow thap pyrtuid ynne ka sngi neibynta wow yakhun ya ka Election kawa daw pynman ha ka 30 tarik uni u bnai.
Ya ki kyrtong ka NPP da synraan lang leh da ki heh ka Party, nadooh u National President uwa man leh u Montri rangbah, u Conrad K Sangma, u National Vice President, u Prestone Tynsong, u President NPP Meghalaya, u Dr. WR Kharlukhi wa kiwi de kiwa yahkhmat ka Party.
Hawa klam cha ki laad pathai khubor, u kyrtong na Mawphlang, u Lamphrang Blah da ong u wa lada chah jied u, daw kreh neibynta i roi i paar wei wow pait leh yei eh ki paidbah wei heijooh i por daw kreh neibynta ka imlang ka sahlang.
Hawa kylli, da ong wa i pynyieñ kyrtong yong ka UDP da u khon yong u MLA warim ym ktah ya oo wei ki paidbah leh hap ki wow bichaar ya u bru uwa da ye u chakri ya waroh kawi ka Constituency.
Neiliang u kyrtong ka NPP na Mawryngkneng, u Pyniaid S Syiem da pynsñiaw u yei sñiawngooh ya ka UDP kawa da pynbna wow kyrchaan ya oo ha ka Election na Mawryngkneng deiwa khlem sai ya u kyrtong.
Da ong u wa waroh kiwa kyrchaan ki kreh chitom ki neibynta wow yoh yei jop wei i jop u man ko neibynta ki paidbah wow yoh ya i kylla hapoh ka Constituency, wei kam uwa mihkmat daw chimkhia leh wow kreh borbah neibynta wow pyndooh noh ya ki kaam sih khamtam i drug wa i dooh kreh ki khynroo kiwa man hakhmat dooh wow yaleh.
Hawa kylli da ong wa ha ka Election da em bait i yakhun wei ym toh wow kheiñstiñ wei pynsñiaw u yei kyrmen wow yoh yei jop, deiwa wa ong wa i sñiawlem ym krehkam ko heipor wa jied ya uwa mihkhmat.
