Ka Dorbar Chnong Saitsama, West Jaiñtia Hills ynne ka sngi da pynman ko ya ka yalang wow pynkup burom ya u Obadaia Kelphung uwa na ka chnong wa da wanrah naam u ha ka lympung yalehke 6th National Jeet Kune Do Championship 2021-22 Junior.
Ya kani ka lympung da pynman ha nongbah Delhi, DJB Indoor Stadium Dellupara East Delhi ha ka 2 wa 3 tarik uni u bnai.
Ha kani ka sngi ya ka yalang da pynlai da u Chairman ka Dorbar Chnong Saitsama u SP Vaichei hei emlang u MDC ka thaaiñ, u Dawan Lyngdoh.
Neiliang u MDC hawa e i klam da dap u dei mynsien wa kmen ya u Obadaia wei da e u leh ya ki kyntien sneiñ kyntu ya oo wa ya kiwi tawon ki khynroo khnang wow man kiwa ye u wanrah burom ya ka chnong ka thaw waroh.
Ha kani ka yalang da emlang kawi ka Village Organisation ka Saitsama kawa tip kam ka Vanglai Club hapoh i yahkhmat u President yong ka u LK Laloo.
Hadien wa da pynkut ya ka yalang da yoh ya ki kyntien khublei na u V. Darnei.
