Ka seiñ HYC da thoh ko cha u Montri Rangbah ka jylla, u Conrad Sangma yow pynduna ya ki dan ki umphñiang kari yow lait u chah ktah ki paidbah heiwa hapoh ka jylla i Petrol da tam spah i wei i Diesel da tam i T. 92 chi liter.
Ka seiñ da ong ko wa kiwi na ki daw wa ku i dor phñiang kari hapoh ka ri waka jylla toh i bai kit yei phñiang wym pu em dep pynkhooid, ka dan wa kheiñ ha kiwa pynchna pynmiat ya i phñiang, kamjooh ka dan Excise Duty daka sorkar pyrdi, ka nong ki thaw dai phñiang deilang wa ka VAT wa kheiñ da ki sorkar jylla.
Da ong leh wa i dor phñiang kari chong i leh hei dor i phñiang (Crude Oil) hapoh pyrthai tangwa iwa ktah dooh yei ku dor toh ka dan wa da booh da ka sorkar pyrdi wa ka sorkar jylla iwa katni da kheiñ ka sorkar pyrdi T. 32-33 chi liter i Petrol kam ka Excise Duty wa ka VAT da ka sorkar jylla kamwa T. 22-23 chi liter katwa ya i Diesel ka Excise Duty toh T. 31-32chi liter wa T. 13-14 ka VAT da ki sorkar jylla.
Kamtæ da ong wa ki bru paidbah da su ki deiwa kheiñlang wa poi 50% hadooh 55% du kam ka dan hawa kheiñ yei dor phñiang kari.
Ini i ku dor i phñiang kari daw pynku ko sa i bai kari ha waroh kawi ka jylla kamjooh i dor ki mar ki mata kiwa hap wow kit da ki kari iwa daw ktah kylla ya ka imlang sahlang khamtam ki warep ka jylla.
Chooh chooh chooh ka seiñ da ong ko wa ha kini ki por wa ka jylla da chah ktah ko ha ka khlam COVID-19 kat u yoo ka sorkar jylla wa ka sorkar pyrdi da pynkhia yukit ki deiwa pynku dor ya i phñiang kari iwa da ktah liang wa nang yei dor waroh ki mar.
Neiliang ka seiñ da kyrpaad ko ya ka sorkar jylla wow sñiawbha wow yaklam ya ini wa ka sorkar pyrdi yow pynduna ya ka dan kamjooh ya ka sorkar jylla wow pynduna da 50% ya ka VAT wa da kheiñ ha i bai Petrol wa Diesel.