I kam ki tre yong ki Coke Factory kiwa em hapoh ka Elaka Sutnga, i kwah i wow pynche paidbah katkam wa man sakhiat iwa kamni ha wah:
Nyngkong hawa i thmu i wow booh ya kini ki karkhana (Factory), i da dep yaklam wei pynbait chwa ya ki thaw wow booh, wei hadien wa da poi i cha i ya sñiawthooh yumut, neiliang ka chnong, u waheh chnong, u Secretary chnong deilang wa i e bor ki Dorbar Chnong, u Dolloi ka Elaka Sutnga, u Secretary ka Elaka da ya mynjur lang da i mon sñiawbha itæ leh hadien wa ki da lai ki wow paitlang ya ki thaw (Joint Inspection) da rai wei da e ki cha i ya ki kot ki sla wa emkaam kitæ ka NOC hawa yatoh waki Factory, wei najrong ini da em leh kamwa ar næ le tylli ki chnong kiwa da kyrchaan wow e NOC ym toh du ya kawi ka Factory, kammon u pynbaad ki ya i, itæ leh khamtam kam ka chnong Latyrke, chnong Moolamylliang wa kiwi kiwi, kamtæ hajrong itai i pynbaad yong ka ECC wa i booh i ya kitai ki Coke Factory ha kitai ki thaw man ki kiwa pyrchah ya ka aiñ, toh iwa bakla wei i wym em yurim.
Najrong itæ, i kwah i wow pynche paidbah wa ini i pyrchah yong ka ECC ya ki Coke Factory, da ong ki wa ya ki NOC leh da e deiwa tip du ki kattu katni ngut ki bru waheh næ kiwa chong chnong, tangwa iwa sakhiat ym man i kamtæ. Wei kini waroh toh ki wym em yurim, ya i da dep e laad wow chna Coke Factory toh deiwa ya monlang kiwa chong chnong hi, wei i e NOC yong u Dolloi wa emburom yong ka Elaka Sutnga u E. Sutnga (baam kwai ha dwar u Blai), wa u Secretary ka Elaka Sutnga u M. Sutnga leh ym toh deiwa leh yong ki du arngut, tangwa i e ki ya ki NOC cha kini ki tre Factory toh hadien wa da yoh yei mynjur lang da waroh ki khon yong ka Elaka Sutnga hi.
I kam ki tre Coke Factory leh i sñiawsih joor i hajrong ini i pynbaad wym em yurim khlem da tip yei sakhiat, wei i sakhiat hi ya kini ki kot ki sla wa da dep e cha i ymtoh kiwa dang ynnin ynne, tangwa kiwa da pynlait NOC da ki phaw phaw snem wa da dep, najrong ini da em leh kawi ka Coke Factory kawa em hapoh ka thaaiñ Umtyra, East Jaiñtia Hills District, Khliehriat, kawa pyrtuid ka Jaintia Coke Factory kawa da e NOC nadooh i por u Acting Dolloi warim ka Elaka Sutnga wei da lai bait lai ryntih, ym jooh em i huri hura nadooh kitai ki por hadooh katni. Itæ leh nadooh u snem 2004, kawa man kawa rim dooh hapoh Ri-loom Jaiñtia, hajrong i e NOC leh da e hapoh ka Elaka Sutnga ha kini snem 2008, 2018, 2019, 2020, 2021 kamtæ i ki tre karkhana hawa i seiñ næ booh ya kiwon kiwon ki karkhana leh ym ye wow booh pyrchah ya ka aiñ khlem da yoh bor næ ki kot ki sla wa biang kiwa haap hapoh u pood u ang yong ki chnong wa marjan lane ki NOC wa biang.
Najrong wa i hap i leh wow bood ya ki kyndon ka aiñ wa ka sorkar da booh ko, kwah i leh wow pynche chooh chooh wa iwa phylla toh wa em ki kattu katni ngut kiwa toh ki dkhot yong ka ECC kiwa man ki EC Member yong ka Elaka Sutnga, wa toh ki wa mynjur wow e NOC ya i tangwa kini ki jooh wa pyrchah ki katni won. Lada ki sñiawthooh ki wa daw em i ktah na kini ki Coke Factory, da mih i kylli wa ileh won e ki ya ka NOC ya i. Kopsar da em iyi iyi daw wa cha kylla. Kamtæ kwah i wow pynche lut khnang wow sñiawthooh paidbah toh wa da leh ya ini hadien wa i da yoh i ya ki kot ki sla na ki chnong yong kitu ki thaw, ki kot ki sla na ki Elaka, na Jaintia Hills Autonomous District Council, ki Clearance Certificate na ka chnat Forest wa kiwi kiwi de.
Kamjooh leh kamwa da yoo ha ki Social Media ha ka 09-10-21, da em leh kamwa kattu katni ngut ki dkhot kiwa da sdang wow ya klam chongchit wei klam klumar ya i wym yatoh katkam ka juk wa da che katni wei ha i jooh i por ki jooh ki dkhot yong ka ECC da maham ki leh wa lada ka sorkar ym leh ko iyi iyi hajrong ini i dawa yong ki, ki da rai ki wow lai tympra hi ya waroh 34 tylli ki Coke Factory kiwa em cha kitai ki thaaiñ, tangwa kam ki tre Coke Factory, i pynche paidbah da iwa che kdar wa lada ka ECC ka pynyoo ko dei bor khlem da kohngooh næ ya krehlang wa ki bor sorkar wow bood ryntih ya ki riti synchaar yong ka ri India wei chim ki ya ka aiñ ha kti jong ki, i leh ym yohsa i wow lai da kawi won ka luti wei wow e ya ki cha ki bor yong ka aiñ deiwa eh ya uwon uwon næ kawon kawon wa tyngkheiñ aiñ, ong ka khubor na u Forgive Dkhar.
