Ki pulit ka South Garo Hills kam chibynta wow booddien ya i takit ka Chokpot Police Station heiyatoh wa ki kaam chah tooh thuk-thuk, hadien wa da pyntip da iwa tikna wa daw em i chah tooh thuk-thuk ynne ka 16 tarik, da yoh ki wow kem ya u snar tooh uwa da pliah bha ha ini i kaam.
Hachwa ini, ha i janmiet ka 15 tarik, da pyntip cha ki pulit wa uwi u bru wa tip kam u Job uwa da jooh chah kem kam uwa myllieñ wow tooh thuk-thuk, ha kani ka kynti deilang wa u lok u u Balgra G Momin uwa khut siñ kam u Nasarudin uwa man leh uwa da jooh chah kem wa tooh thuk thuk, da thmu ki wow tooh ya kawi ka thuk-thuk Pulsar kawa em ha ka thaaiñ Chokpot wei daw lai e ya ka cha uwi u bru u wym pu timpit.
Kamtæ ki pulit ka Baghmara PS kiwa da phah kyrpang cha Chokpot PS da yang pynsangeh kari ki ha kiwa boon ki thaw. Heiwa ha kawi ka sarok wa pynemkaam yow mih na thaaiñ Chokpot iwa tip kam i Ashugre-Deku iwa man leh i le laad heiwa da yoo ki ya kawi ka thuk-thuk heipor 5:00 waje i step ynne ka 16 tarik kawa da wan cha ini i thaw.
Hadien wa kaweh ki pulit wow sangeh, kini ki arngut kiwa em ha ka thuk-thuk da pynhær ki yow yut cheiliang ka Ashugre hadien wa yoo ki ya ki pulit.
Da kdong ya kani ka thuk-thuk da ka kari pulit kawa da yang chwa ha ini i thaw wei chwa wow poi ha Ashugre wa da em sa kiwi ki pulit kiwa da yang chwa, da kem ya kani ka thuk-thuk Pulsar 150 CC wa em ya u Chassis No. MD2DHDHZZUCA12099 wa Engine No. DHGBUA93493. Tangwa u chong hadien uwa tip kam u Job uwa na ka chnong Gonganggre da yoh u wow yut deiwa kynthiar na ka thuk-thuk wei da yut u chapoh khloo wa rben wa em hajan.
Uwa chah kem da tip kam u Balgra G Momin uwa khut siñ Nasaruddin, uwa 29 snem i rta uwa na Rengchi, PS Shallang, West Khasi Hills.