Ka Amita Sangma chirup wa ka Agnes Kharshiing kawa man kawa yahkhmat yong ka CSWO ynne ka sngi da ujor ki pyrchah ya uwi u bru uwa da pynbaad wei da maham ya ki hadien wa da phah kem ki ya ki 3 tylli ki truck kit mooyong ynnin ka sngi 17 tarik ha Wahsnait, East Khasi Hills.
Ka Amita da ong ko wa da em ki bru kiwa da pyntip cha ka ynnin heipor kamwa 9:00 waje i step lyngba ka Phone wa em ki truck wa kit mooyong tooh ha Wahsnait, heiwa da lai ko cha ini i thaw wei da chem ko wa em 3 tylli ki truck wei da phah ksoh noh ya ki ha ki pulit, wei da khana ko leh wa hei janmiet da lai biang ki cha ini i thaw heiwa da chem wa kini ki truck dang em ki, tangwa ynne i step da yoh yutip wa kitæ ki truck ym em de ki ha ini i thaw.
Da ong ko wa ynnin i miet uwi u bru da Phone u ya ka heipor kamwa 10:00 waje wei utai u bru da ong u wa tipmit u ya u khon yong ka, wei da jubab ko ya oo deiwa ong wa ymtoh u maham u pyntieñ ya ki khon neibhah ini waroh toh i leh yong ka hi.
Neiliang ka Agnes Kharshiing da ong ko wa utæ bru da Phone chwa u cha ka na u jooh u Number tangwa nei wym hoi ka Network da Phone noh u cha ka Amita, heiwa da ong bait u wa tipmit u ya u khon iwa man kam i maham.
Hawa ujor yeini pyrchah ya uni u bru ha Madanriting Police Station da pynbaad ki leh wa ya uni u bru da tip ya oo kam u Nick Nongkhlaw.
