Kawi ka khynnah kynthai kawa na iwi i chnong na West Jaiñtia Hills da ujor ko ha ki pulit pyrchah ya u pa tre ko neidaw wa chah slaitbor ko ha oo.
Ha ka ujor da ong wa heipor wa dap ko 13 snem i rta ha u snem 2007 da chah slaitbor ko ha u pa ko hapoh iwi i khloo wei manda mut ko wow pyntip cha kiwa ha yung ha sem da maham pynyap u ka kamjooh ya kiwa ha yung yong ka.
Da khana ko leh wa da pun ko ya i khon ha u jooh u snem (2007) tangwa ym nood ko wow khana ha itu i por wei ya ini i khon da kha wei da em i wa ka hadooh katni.
Wei hei wa ar katwa ki snem ki por dang lai ki, ym bna de u iyi iyi wei da leh u klem pyrkhat de ya i pap i sang hadooh wa da pun khon biang sa iwi tangwa ini i khon da khlaad noh i heipor wa em i ar snem i rta.
Ha ka ujor da ong leh wa katwa dang lai ki por, uni u pa da pteiñ u wow maham wot hadooh katni leh ya kiwa hayung yong ka kiwa da yo phylla yeini wei da pyrchang ki wow kylli bniah, wei heipor wa hap ko wow sah samen ha yung yong ka hi ha uni u snem 2021 hadien wa kiwa hayung da phah ki wow sah ko samen deilang wa i khon. Ha ka 27-07-21 da wan kyrsu dwar biang u heipor miet wei da rai kut ko wym wai yei yung tangwa da kyrtem u ya ka yung ka sem hadooh wym yohsa de wow Phone cha kiwa hayung hasem yow khana ya ki, kamtæ da wan ki wei da mih pyrthai ini wa jia.
Kamtæ kiwa hayung hasem da rai kut ki wow e ya uni cha ki bor yong ka aiñ wei da wan ko chakhmat wow ujor yow yoh yei yada wei wow kyrpaad ya ki bor ka aiñ wow pynchitom katkam ka aiñ ya uni u bru wei i daw wa slem leh wow ujor toh neidaw wa da maham u wow pynyap ya ka da ka wait ka tari.
Hadooh wa pynmih ya ka khubor ym pu em yoh kem ya ini u bru hadien wa wan thooh ki pulit oo.
Ka ujor toh kawa da e ha ka 16 tarik uni u bnai.
