U National President ka National People’s Party, u Conrad K Sangma da ong u yow jied ya u kyrtong ka NPP lada ki paidbah kwah ki wow pynman kaam yei angnood u David Nongrum uwa man u MLA yong ka seiñ Congress uwa da khlaad noh heiwa da hap wow pynman ya ka Election chiteiñ samoi ha Mawryngkneng.
U Conrad hawa klam ha ka rynsan yalap Election neibynta u kyrtong ka NPP, u Pyniaid Sing Syiem ha Umpling ynne ka sngi, da ong u wa toh i dooh wa khroo nei khlaad noh u MLA David Nongrum, tangwa toh i mon u Blai. Tangwa da ong u wa ka imlang sahlang hap ko wow lai chakhmat.
Da ong u em kiwa yalap neibynta wow sah kynmoo ya u MLA wa da khlaad noh wei toh u jied ya ka Party wa da mihkhmat u, deiwa pynsñiaw wa ym yahaap ini, tangwa da ong u lada kwah wow sah kynmoo ya u David Nongrum, toh du da iwi wa emkaam wow leh itæ toh deiwa pynmankaam yei angood u deiwa Vote ya ka NPP yow pynmankaam yei thrang u MLA wow pynku ya ka Mawryngkneng Constituency.
U Conrad da ong u wa u David da thrang u wow pynbiang ya ka luti ki syngkieñ wei thrang u leh wow wanrah ya ka Mini Stadium ha Umpling, wei du kawi ka laad wow ye u leh ya ini toh deiwa ya krehlang wa ka sorkar neibynta wow yoh u chongngiah u MLA wa da khlaad.
Ha iwi i liang, u Conrad uwa man leh u Montri Ranngbah ka jylla da ong u wa hapoh i yahkhmat ka NPP ya ka sorkar MDA nadooh wa kani ka sorkar da chimkti ko ha u snem 2018, da mih chiboon i eh wa da ktah leh ya i suk i saiñ na i kynaad ha Them Metor, da ong u wa ini i phang Them Metor toh iwa da slem wei kawa eh, tangwa kani ka sorkar da thooh ko ya ka laad wow pynbait deiwa chim leh ya ki rai wa kiwi ki sorkar ym nood ki wow leh.
Da kam u leh wa toh ka sorkar NPP kawa da chim khia wow yoh noh i tipmit ya i ktien Khasi wa Garo ha ka 8th Schedule ka riti synchaar ka ri India, deiwa pynbaad wa ki sorkar kiwa da lai noh ym em leh ki iyi iyi leh hajrong kani ka phang leh.
