Ka Khasi Hills Autonomous District Council (KHADC) daw wanrah noh ko ya ka aiñ hawa kiwa yahkhmat chnong yow pait ki yei emkaam i roi i paar ha ki chnong ki thaw wa i pynkrehkaam ya ki kaam pynroi, wei ya ya kani ka aiñ ka KHADC da pynkhreh yow wanrah noh ha ka dorbar kawa daw man ha u Khonchonglad (Nov) uni u snem.
U Chief Executive Member ka KHADC, u Titostarwell Chyne da pyntip u wa ka Executive Committee da rai ko wow wanrah noh ya ka Khasi Hills Autonomous District (Village and Town Development Council) Bill, 2021, wei kani ka aiñ toh bait neibynta ki kaam pynroi hapoh yong ki chnong.
Katkam i pyntip u CEM, u Chairman yong ka Village & Town Development Council u man bait da u Rangbah Shnong, katwa ki dkhot wa kynthup ya u Vice Chairman, Secretary wa Treasurer daw jied da kiwa chong chnong kiwa toh ki tre chnong wei kiwa da kynjoh yei rta wow thap Vote.
Da pyntip u wa ka samoi krehkaam yong kini ki Council u man ki neibynta 5 snem.
