U Symbood Montri Rangbah ka jylla, u Prestone Tynsong uwa man leh u Chairman ka High Level Committee wa da thung wow pynkyrriah ya ki bru na Them Metor, da pyntip u wa chnat Urban Affairs da dep ko wow chikmti ya i thaw ha Them Ïewmawlong namo ka Sweepers Colony kamwa da dep soi ya ka soskular hapyrdi ka chnat Urban Affairs, ka Shillong Municipal Board wa u Syiem ka Hima Mylliem, heiwa da ong leh wa katni da sah ya ka Kynhun Montri (Cabinet) wow chong pyrkhat biang hachwa wow pynemkaam noh ya ini i thaw.
Hawa kylli, da ong wa ka sorkar ym em da ko da kiwi won ki laad ya ki bru kiwa sah ha katai ka thaw wa toh u ya krehlang bait ki wa ka sorkar wei ym toh u pyrkhat wa ka sorkar ka lehbeiñ næ da noh hi-eh ko ya ki, tangwa toh u sñiawthooh wa ka sorkar pynkyrriah ko ya ki cha ka thaw kawa rap biang.
Da pyntip u wa heipor wa da chna ya ka HLC, da phah ya ka SMB wow lai chim yukheiñ yei em ki bru ha katai ka thaw, wei ha itai i por neiliang ki bru kiwa chong chnong ha Them Iewmawlong ym em ya krehlang ki waka sorkar wot hadien wa da pyrchang hadooh 3 sien.
Da ong wa hadooh kattæ ka sorkar ka klam che ko wa ini ymtoh wa beh beiñ ya kiwon kiwon na katai ka thaw, tangwa i kwah toh wow pynkyrriah ya ki cha ki thaw wa rap bha kiwa da dep wow pynkhreh, neibhah kamwa man katni katai ka thaw ym man de ko kawa chngaaiñ yei chait i khiah wow chong wow sah.
U Symbood Montri Rangbah da kyntu u leh ya ki bru ha katai ka thaw wow ya krehlang ki wa ki chnat ka sorkar.
Hawa kylli chooh chooh lada em kiwa pyn-eh næ kiwa dang pyrchah, neiliang u Prestone da ong u wa lada em kiwa kam kitai, ka aiñ daw leh ko ya iwa emkaam.
