U National Vice President ka National People’s Party (NPP) uwa man leh u Symbood Montri Rangbah ka jylla, u Prestone Tynsong da ong u wow lai uiñ biang cha ka Congress toh i wym ye wow man neibynta kiwa boon kiwa yahkhmat ka NPP, laitnoh du kitu ki wym sñiawthooh næ ki wym yoo wa ka Congress da ngam ym du ha ka jylla tangwa ha waroh kawi ka ri.
Da ong u wa kiwa yahkhmat ki seiñ saiñ pyrthai kiwa da pliah wa ki warim la kammon kammon leh ym lai pynyabi de ki wa ka Congress wei i daw toh wa da tip lut da waroh. Da ong u wa ka Sonia Gandhi leh da mynjur wei da klam che ko wa em i piah wa joor bha ha ka seiñ Congress.
U Prestone da ong chooh chooh u wa wot u Vincent Pala uwa man u President ka MPCC leh da pdiang u da idæ wym em ya sñiawthooh yumut u wa uwa yahkhmat ka CLP, u Dr. Mukul Sangma, wei ini da pynyoo wa chit wa che, heiwa da ong leh wa lada em i yachruit na chapoh daw em leh i piah arliang iwa mut wa em ha ka yung kawa da piah, wei da pteiñ chooh chooh u wow ong wa ini mut wa da kylla ka lieñ kawa da sdang ngam wei hawa ka lieñ da sdang ko wow ngam hap bait wow kynthiar na katæ ka lieñ yow lait nei ngam.
Hawa kylli hajrong i pynbaad ka Congress wa ka NPP ka pynlang spah ko na ka jylla yow pynkhlan ya ka Party, u Prestone da ong u wa itæ da lai ko ha ka Congress neibhah ki hap ki wow e yarap cha ka AICC na ka jylla yow pynkhlan ya ka Party cha kiwi ki jylla.