Wow pynchlur ya ki khynnah ka thaaiñ War Jaiñtia heiyatoh wa i puræ puthi, ka Khasi Student’s Union, War Jaiñtia Circle da pynkup burom ko ya ki khynnah ka thaaiñ da ka 4th Mait Shaphrang Academic Award 2021 ha ka yalang wa man ha Syiem Jingsuk, Amlarem heiwa da em palat 58 ngut kiwa da chah pynkup burom kiwa da leh bha ha ki Exam SSLC, HSSLC, CBSE.
Da pynkupburom leh ya ki le ngut kiwa kynrthup ya u Dr. Kermi U Tariang, u Michel Myrchiang uwi na kiwa chna Film ka thaaiñ, wa u Daimon Mickey Lamin uwa da yoh ya ka kyrdan PhD haka Subject Geology.
Ha kani ka sngi u Shemphang Lyngdoh Mawphlang uwa man kam u Litigation Secretary ka KSU Central Body da man u kam u kongsan hei emlang u Donkupar Moksha uwa man kam u Sub-Divisional Police Officer, u Sonstar Nongkhlaw Asst. Finance Secretary Central Body In-charge Jaiñtia Hills, u President ka Synjuk Waheh Chnong Ri-loom Jaiñtia u A. Lipon wa kiwi kiwi.
Kiwa klam ha kani ka sngi da kyntu ki ya ki khynnah wow man kiwa kreh chitom sam chaphrang khnang wow ye ki wow wanrah ya i naam heiwa daw ye ki wow ksoh ya ki kyrdan waheh ha ki chnat krehkaam ka sorkar jylla wei wow ri ki yei akor wa i burom.
U kongsan ha kani ka sngi u Shemphang Lyngdoh Mawphlang da pynsñiaw u kajiak hajrong i lai luti ka seiñ deiwa ong leh wa katkam ka yurim yong ka seiñ toh wow pynku ya i puræ puthi kamtæ ka seiñ da wai chnat ko cha kiwi ki jylla khnang wow ye u yarap ya ki khynnah kiwa em cha baar.
