U District Magistrate, East Jaiñtia Hills District, Khliehriat da pyntip u wa ka lehniam thang-charak (Diwali) kiwa ngait niam Hindu daw man ko ha ka 4 tarik uni u bnai kamtæ da booh ya ki kyndon wow khang ya ki paidbah u leh ki heiyatoh wa i thang bomkala, wei kammon wow yada ya ka rymaw wa i chait i khiah ki bru.
Da ong u wa ka NGT ha ka hukum wa da pynmih ha ka 09-11-2020 da yaleh ko u khoom u kdoh yei mih i tdem khamtam wa em ka kjut khlam COVID-19, kamtæ da sñiaw emkaam wow khang yei pynemkaam ya ki bomkala.
Heiyatoh wa ini u District Magistrate, East Jaiñtia Hills District, Khliehriat da pynkrehkaam u ya ka Section 144 Cr.P.C wow khang yei dai, i thied ya ki bomkala wa chna na baar ri.
Da khang wow pynemkaam ya ki bomkala wa pteiñ (Series crackers or Iaris) kiwa ye u pdung yong-heh, kiwa pynmih tdem rap boom, wei kiwa ye u ieh yei jhep chadien (Solid Waste), wow thang ya ki bomkala wa pdung bor palat 125 dB (A1) lane 145 dB (C) Pk hapoh 4 meter nei thaw wa thang.
Chooh chooh da khang wow thang bomkala hapoh 100 meter na ki thaw sumaar, ki thaw puræ, ki yung bichaar, ki yung mane blai wa kiwi ki thaw kiwa man kam ki Silent Zone.
Ki dukan wa dai bomkala leh toh du kiwa da yohbor næ License katkam wa da e da u District Magistrate, East Jaiñtia Hills District deiwa bood ya ki kyndon ka Central Pollution Control Board.
Kani ka hukum da man ko kawa krehkaam hadooh wa kut ka lehkmen snem thymme (New Year).