Ka yung bichaar ka West Jaiñtia Hills District ha ki ar bnai kitæ u Naikhynde wa Naichiphaw uni u snem da phah kset ko chi rta ya soo ngut ki bru wa emkti ha ki kaam tynyap bru kiwa man kamni ha wah:
Ya u Marsanki Tariang da phah kset chi rta deilang wei daiñ kuna wa T. 50,000 heiyatoh wa iwa jia ha ka 19-03-2015 heipor 10:00 waje i miet heiwa u Marsanki da thang im u yaka kurim u ka Marsooki Tang hapoh i yung wa sah ki ha Iooksi Priang wei yeini da ujor FIR da u waheh chnong kani ka chnong. Ya ka hukum phah kset da pynmih ha ka 24-09-21.
Ya u Dinesh Niang leh da phah kset chi rta deilang waka kuna wa T. 50,000 heiyatoh wa iwa jia ha ka 02-01-2009 heiwa da chah ujor u Dinesh wa dung u da ka tari ya u Rida Dkhar ha i thaw wa tip kam i Jrikhla Ionglwit heiwa da mynsoo joor u wei da kit ya oo cha Dr. Norman Tunnel Hospital, Jowai tangwa da khlaad noh u. Ya ka hukum da pynmih da ka yung bichaar ha ka 30-09-21.
Related posts
Ya u Kyrshan Rymbai kamjooh da phah kset chi rta deilang waka kuna wa T. 10,000 heiyatoh wa iwa jia ha ka 29-08-2005 heiwa ha katai ka sngi u Kyrshan da tynyap u pyn ya u ma u uwa tip kam u Lonfour Rymbai ha chnong Ringkyntien hapoh i pchem yung u Molan Dkhar deiwa pam ya oo da ka wait hadooh wa khlaad u pyn ha ini i thaw hi. Ya ka hukum da pynmih ha ka 22-10-21.
Sa uwi toh u Winlyroi Sungoh uwa da phah kset chi rta deilang waka kuna wa T. 50,000 heiyatoh wa i chah rahbor iwa da jia ha Jowai ya kawi ka kynthai (19 snem) ha ka 24-02-2009 kawa da chah rah cha Mookyndeng wei hadien wa thooh ya kani ka kynthai ha kiwa boon ki thaw, da chem yei metyap yong ka ha 28-02-2009 nei khloo wa tip kam i Brimanai wa em ha chnong Mookyndeng deiwa em boon ki dak hei doh i pran wa chah dat chah choh ko. Ya kani ka hukum da pynmih ha ka 27-10-21.
