Ka Confederation of Meghalaya Social Organisation (CoMSO) da e ko i kyrchaan wa pura ya i yakhih wa jai-jai kiwa sikai Sarva Shiksha Abhiyan (SSA) hajrong i wym yoh tulop ki la 5 bnai kattu. Ini i yakhih kiwa sikai da sdang i ynne ka sngi ha Jaiaw Jingthang Briew wei da lai kjat ki chadooh cha Madan Student heiwa da em ka yalang wa chimbynta da ki hajar ngut kiwa sikai.
Hawa klam ha ka yalang, u Chairman ka CoMSO, u Robertjune Kharjahrin da khyrwait u ya ka sorkar deiwa ong, “Oo sorkar ham pyntieñ pynkyrbæh ya ka ri wa ka jaitbru, neibhah katkam i klam u Montri ka chnat puræ puthi da booh wow khang ya aw jan waroh ki skur SSA ha ka jylla” deiwa kylli leh wa lada jia wa ka sorkar India sangeh noh ko ya kani ka Flagship Programme, da mut mo wa ka sorkar jylla u khang khyrdep noh ko ya kini ki skur wei u beh kreh noh ko ya waroh kiwa sikai SSA.
U Chairman ka CoMSO da beiñ u ya ka sorkar wa ymtoh wow leh kaamke ko deiwa pynrap wa waroh tip ki ya ka parom i parom ka puræ puthi hapoh ka jylla wa man kyndeh ko tangwa toh u yada ya i puræ puthi ha ka jylla.
Da ong u wa waroh tip ki wa i puræ puthi ha ka jylla ym em u wan i na ka sorkar tangwa na ki seiñ niam wa ki Balang waphær waphær kiwa noh kyllooid mynsien neibynta ini i kaam wa khroo. Najrong ki Balang da ong u wa toh ki Dorbar Chnong, ki Dorbar Hima wa ki bru samen kiwa da sdang dei bor samen yong ki wow wai ya ki skur wei lada ym em kini, ka ‘Literacy Rate’ ha Meghalaya ym poi ko wot tang 30% leh hadooh katni.
U Robertjune da ong u leh wa lada ka sorkar leh kaamke wei kheiñstiñ ko ya ki mat dawa kiwa sikai, ini pynyoo i wa da kyndehke ko ya ka mynried i puræ puthi ha ka jylla neini chakhmat.
