Hadien wa pynrah sñiooh khmat u ya kiwa jied bru yalehke ha ka Syed Mushtaq Ali Trophy T20 Tournament, u Leg Spinner ka Meghalaya, u Himan Phukan da chah jied u ha kiwa yalehke ha ka Indian Premier League ka Mumbai Indians wow chibynta hei jied ya kiwa yalehke namo ka Trial.
U Phukan da chimbynta u ha ki ar tylli ki yalehke wei da kawang bol u 7 Over deiwa yoh chi Wicket deiwa chah kamai dun 6 Run chi Over.
U Pukan uwa em 23 snem i rta daw lai u cha Mumbai ha ka 13 tarik uni u bnai.
Ka Meghalaya Cricket Association, lyngba u Honorary Secretary, u Gideon Kharkongor, da pynsñiaw u yei kmen wa u Phukan da man u kam uwa yalehke wa nyngkong dooh napoh ka jylla wa chah khut ha kiwa yalehke ha ka IPL wow chimbynta ha ka Trial.
“Kyrmen wei duwai i wa daw yoh u wow psiah cha ka IPL. Daw man i leh iwa daw e mynsien bha ya kiwa yalehke ka jylla,” da ong ka MCA ynne ka sngi.
