U Deputy Commissioner ka West Jaiñtia Hills District, u Garod LSN Dykes ynne ka sngi da pynlait paidbah u ya ka kari, ka Generator wa ki Solar Lamp neibynta wow yoh myntoi ki skur miet wa ki warep ka Ri-loom Jaiñtia kawa tip lem kam ka “Illuminating Night Schools & Energy for Farms of Jaintia Hills”, ha ka yalang wa tbian wa pynman ha pchem ka ka yung krehkaam u DC ha Jowai. Ini toh iwa yoh naka NABCONS deiwa ya krehlang ka NABARD waka BIDS.
Ya kani ka kari, ka Generator wa ki Solar Lamp da ekti cha ka Bosco Integrated Development Society (BIDS) wow pynlai ya ki neibhah wa man ko kam ka Project Implementation Agency, heiwa ya ka poisa wan ko na ka CSR Fund ka NABCONS kawa man ka Company ka NABARD.
Ka GM, ka N. Guite wa u AGM, u G. Kharlukhi ka NABARD da ong ki i thmu wow pynyoh ya kini ki laad yarap toh yow yoh ki khynnah wa puræ ha ki Community Night School Project kawa em ha East wa West Jaiñtia Hills manda wan ki cha skur hadien wa mylla næ kreh daw yoh ki yei che wot hapyrdi wa dooh bordiñ.
Ya ka Generator da ong u wa ye ki wow pynemkaam hawa em ki yalang, hawa taan um wa kiwi kiwi.
Katwa ka kari won da pynkhreh wow pynemkaam ha ki kpær soh hapoh Laskeiñ Block, West Jaiñtia Hills heiwa hadooh kamwa 200 tylli ki manung u yoh myntoi ki kam hei wow kit symbe, sboh, wow lai dai ya ki mar wei wow kit ya ki tiar ka skur miet.
Chooh chooh da ong wa da jooh hikai ki leh ya ki warep kammon wow thung ya ki dieñ soh waphær waphær wow psan mrad wa kiwi kiwi.
Da ong u leh wa kani ka Project u lai ko hadooh 6 snem wei i daw wa ekti wow pynlai da ka Bosco Integrated Development Society (BIDS) toh wa boon ki Project wa yatoh wa ka sorkar jylla da pynlai da ka kiwa kynthup wa ki kpær soh, ki skur miet wa kiwi kiwi.
Ha kani ka sngi da emlang u SP ka West Jaiñtia Hills u BD Marak, ka NABCONS na Guwahati, kiwa mihkhmat na ki Bank waphær waphær wa ki chnat sorkar.
