Ynne ka sngi ka Dr. Norman Tunnel Hospital, Jowai da yoh ko ya ka kor Ultrasound Machine ya kawa da e da ka karkhana Star Cement hapoh ka CSR wa ka Anesthesia Workstation ya kawa da yoh na ka Chief Minister Special Development Fund ha ka yalang wa sakhi lang da ki MP ka jylla.
Ha kani ka sngi da em ka yalang wa pynlai da u Rev. NS Phawa uwa man u Chairman ka Managing Committee, i klam waiphang na ka Dr. D. Nongpluh kawa man kam ka Medical Superintendent kani ka thaw sumaar.
Neilaing u Tejbir Singh uwa man kam u Administrator ka Star Cement da khana u ya i parom wa tbian yong kani ka kharkhana wei kamjooh leh kammon da ye u wanrah ya kani ka kor ha kani ka thaw sumaar.
Kam u kongsan ha kani ka sngi u MP ka Lok Sabha, u Vincent H Pala hawa e i klam da ekhublei u ya ka Star Cement wa da e ko ya kani ka kor ya ka thaw sumaar. Heijooh i por da kular u ya kani ka thaw sumaar wow thooh ya ki laad wow yarap ya ka chirup wa u MP ka Rajya Sabha, u Dr. WR Kharlukhi.
U Dr. WR Kharlukhi uwa man u MP ka Rajya Sabha da ong u wa oo em u i yatoh wa khlan bha wa kani ka thaw sumaar nadooh dang khian wei da jooh yaleh u wow yarap ya kani ka thaw ha ki por wa dadep.
Chooh chooh da ong u wa oo wa u VH Pala daw kreh ki chirup wow wanrah yei myntoi ha kani ka Hospital kawa ye u e chakri ya ki paidbah hanla cha baar man ki kiwa yaleh pyrchah iwi ya iwi.
Kiwi kiwa da klam ha kani ka sngi toh u Garod LSN Dyes, u Deputy Commissioner ka West Jaiñtia Hills, u Kingshok Kamal Borah, Manager CSR, Star Cement wa kiwi kiwi.
