Kam chibynta wow sdang noh ya i rukom noh jhep iwa katkam ka juk stat wa katni deiwa pynkhlaad chwa yei jhep pyn na yung na sem, neiliang u MLA ka Jowai, u Wailadmiki Shylla da sdang saam u ya ki Household Bin kiwa em ar rong cha ki Dorbar Chnong waphær waphær ka sor Jowai.
Kini ki thaw noh jhep toh kiwa em rong suiñ bneiñ (Blue) ki wow pynlang ya ki jhep wym py’ut (Non-biodegradable Waste) wa ki rong yirngam (Green) wow pynlang ya ki jhep wa py’ut (Biodegradable Waste).
Ya kini ki Household Bin da saam hadien ka yalang wa tbian wa pynman ha Chutwakhu Auditorium Hall Jowai.
Ha ka yalang neiliang ka Chief Executive Officer ka Jowai Municipal Board (JMB) ka B. Blah da ong ko wa ini u man i chibynta wow wanrah yei suk wa i bha i miat ha ki chnong ki thaw neibhah kamwa man katni i jhep wa mih na Jowai man i 60 Ton chi sngi iwa kynthup ya kiwa na yaaw na haat.
Hajrong i rukom lai kit ya i jhep, da ong ko wa neiliang ka JMB daw pynlai ko jar jiar ki sngi katkam ka pali wow kit ya kini ki ar jait ki jhep.
Da kyntu ko ya ki paidbah ka Jowai wow chim kabu ya ki laad yarap wa ye u yoh lyngba ka chnat Municipal wei ki waheh chnong leh u e wyrta ki cha ki chnong ki thaw hajrong ki Scheme kiwa kynthup ya ka Welfare Scheme, ka Deen Dayal Antyodaya Yojana National Livelihood Mission, ka Social Mobilisation and Institutional Development, ka Self Employment Programme, ka Employment Through Skill Training and Placement, ka PM Svanidhi, PM Street Vendors Atma Nirbhar Nidhi, ka Swatchh Bharat Mission, ka Pradhan Mantri Awas Yojana wa kiwi kiwi.
Neiliang u MLA ka Jowai, u Wailadmiki Shylla da ong u wa hajrong wa ka Jowai Municipal Board da yoh ko ya i thaw noh jhep wa pura, i em ki karkhana pynmih khyndaw-bilat ha ka thaaiñ man i kam i kyrkhu neibhah wa ka sorkar pyrdi da pynmih hukum ko ya ki karkhana wow pynemkaam da ki jhep ki wym py’ut neibynta wow thang hawa pynmih khyndaw-bilat wei i booh ya kini ki Household Bin kiwa jar jiar ki rong toh wow pynkhlaad wei wow pynsuk ya ka Board chwa wow phah cha kini ki karkhana.
Da ong u wa ini daw yarap i wow pynduna yei chah ktah ka rymaw tangwa emkaam leh yei yakrehlang ki paidbah. Da pyntip u leh wa katni da pynkhreh wow yoh ya ki kari wow pynkhooid Septic Tank neibhah ha sor da chitom wow yoh wow chna ya ki ryngkat wa ki Filter.
Kiwi kiwa da klam ha kani ka sngi kynthup ki ya u Chairman ka Board u F. War wa u P. Lyngdoh uwa man u Waheh Chnong ka Chutwakhu.
