Chi snem tam chwa wa ka jylla daw lai ko cha ka Election MLA, ka seiñ saiñpyrthai wa thymme ha ka jylla, ka Voice of the People Party (VPP) da pynbna wa da sdang yei lai luti neibynta wow wanrah yei kylla ha ka saaiñ hima sima. Ya ka VPP da pynbna paidbah deilang wa ki kyndon krehkaam ynne ka sngi ha ka yalang General Meeting wa nyngkong kawa da pynman ha Laitkor Kynton U Mon.
Hawa klam ha ka yalang, u President ka VPP uwa man leh u MLA warim na Nongkrem, u Ardent Miller Basaiawmoit da ong u wa da i kut yumut kawa skem da pynman wow chim yei rai wow seiñ ya ka Party wa thymme, khamtam hadien wa i kaam saiñ hima sima da lai dei bor poisa wei da pynchlur ya ki heh spah wow lai cha ki Constituency yow pynlut, wei ini da pyndooh noh ya ka jylla wow em kiwa chna aiñ kiwa biang wa kiwa chemphang iwa da wanrah yei chah ktah ka jylla ha kiwa boon ki liang.
Da ong wa ka thong wa da booh da ka VPP toh yow pynuiñ noh ya iyi iwa da cha pynjæd wei chah pyndooh noh, kam i miat ka jylla wa i yirngam ka Mariang wa da chah pynsihdur. Wow pynim biang ya iyi wa da dooh noh, khamtam ha i yoh i laa iwa da yap ha ki thaaiñ palatsor. Wow pynkylla ya ka jylla neibhah wa ka jylla dang em ko yei sahdien ha waroh ki liang wei ym de iyi iyi wow sarong.
U Ardent da ong u wa ha kini ki sngi, neibynta wow yoh man MLA hap dei thied, wei hadien ka Election lada lait kaam Nurse, kam pulit næ lait kam sikai, da em i dor wa ki paidbah hap ki wow thied ya ki kaam ki jaam, wei da pynsñiaw u wa neibynta wow yoh kaam ym chong hei ye ki khynroo khyllood wow thooh kreh, tangwa chong katwon em poisa wei i roi i baam-tooh da man ko iwa chyrkhei.
Da ong u wa heipor wa da pynbna wow seiñ ya ka Party thymme, i thong toh yow wanrah yei kylla wei i kylla ye ko u wan du deiwa kyrchaan yong ki bru kiwa sñiawkhia yei long i man ka jylla.
Chwa ka yalang paidbah, ynne ka sngi ka VPP da pynman ko leh yei jied ya kiwa kitkaam wa hakhmat, heiwa da jied ya u Ardent M Basaiawmoit kam u President wa nyngkong ka Party, u Dr. Kara H Chen kam u Vice President wa u Dr. Ricky A J Syngkon kam u General Secretary najrong u Joint Secretary, Treasurer, Organizing Secretary, Finance Secretary wa Auditor.
