theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Chwa ka Christmas kyrmen u Thombor Shiwat wow yoh tulop ki wakreh ka JHADC

Advertisement ad1

Ynne ka sngi ha ka Dorbar Tlang yong ka JHADC, uwa yahkhmat ka liang pyrchah, u Andrew Shullai da wanrah u ya ka phang yaklam (Motion) hajrong i kaam poisa wa i tkoh i krehkaam ka Council iwa da booh hei eh i khoo ya kiwa boon wei khamtam ki wakreh ka Council kiwa dei wym yohsa da hap lai ki cha yung kasari wow dawa ya ka tulop yong ki.

Ha ini i yaklam neiliang u Andrew da ong u wa neipor cheipor da jooh yaklam hajrong ka bhah yong ka Council wa toh u yoh ko na ka sorkar jylla heiwa da ong wa chibet da toh u yoh ko T. 1000 klur tam, chibet T. 70 klur tam kamtæ ter ter wei ini i rukom pynslem ka sorkar wow pynlait ya ka bhah yong ka Council pynyoo che i wa ka sorkar jylla da thombor ko ya ka Council.

“Iyi wei kammon u jia ha ki 4-5 snem wow wan lada kamni pteiñ i kaam, tip daw em mo ym em de ka Council?,” da kylli u Andrew.

Da kdaw u ya i tlot ha i rukom krehkaam ka Council nadooh ki Trading License, ka dan wa toh u yoh ka Council na ki karkhana nadooh ki karkhana pynmih khyndaw-bilat, ki karkhana Coke wa kiwi kiwi.

Dei mynsien wa khia da kyntu u deiwa ong, “I kaamram yong i kam kiwa mihkhmat toh wow pynlai bait ya i kaam ka Council neibynta ka mynried yong ka”.

Ha kani ka phang yaklam wa da wanrah da u Andrew, da chimbynta leh da kiwi ki MDC kiwa man leh kam ki Executive Member ka Council kamjooh leh u MDC wa em ha ka liang pyrchah, u Holando Lamin uwa da ong wa ini i kaam man iwa khia bha.

Da kyntu u ya ki MDC waroh wow krehlang ki neibynta wow pynim ya ka Council wa khamtam ya ki wakreh kiwa da dooh tulop da boon bnai kiwa emkaam wow pyndap ha yung wei wow ri wow psa ya ki khon ki kti yong ki.

U Winning G Sungoh hawa klam hajrong kani ka phang da ong u wa ya ini da yaklam ka EC neipor cheipor tangwa emkaaam leh wow kynmoo wa ini toh i tlot ha i rukom krehkaam ka Council nadooh ki por nachwa katwa kamtæ emkaam wow thooh ya ki thaw wa liat (Leakage) ka poisa ka dan.

Da ong u leh wa ka Ri-loom Jaiñtia man ko kawa mahajon bha heiyatoh wa ki mar poh-khyndaw wei emkaam wow thooh laad kammon u ye u myntoi ka Council na kini wei wot hadooh ki NOC wa e ya ki karkhana da toh u yoh bhah ka Council.

Hajrong itæ i tlot krehkaam wa i duna ka dan wa yoh ka Council da ong u wa ha ki snem wa dadep da sakhi wa ka dan wa da yoh ka Council hapoh kani ka EC da ku ko da 9-10%.

Hawa yaklam hajrong kani ka phang, u Phasmon Dkhar da ong u wa wot hapyrdi wa duna ha i poisa poilañ, ka Council da lai ko chaphrang wow pynkreh ya ki kaam yong ka deiwa kdaw ya ki Project wa kreh ka sorkar.

U Lasky Rymbai hawa e i klam ha kani ka Dorbar da ong u wa ka EC katni da boooh ko ya ki kyndon heipor wa e NOC ki yow myntoi ka Council deiwa ong leh wa katkam wa man katni dang yang ya ka bhah ka Council na ka sorkar jylla kawa dang sah nadooh u snem 2014-15 hadooh u 2017-18 kamtæ ter ter.

Kam u CEM ka Council, u Thombor Shiwat da ong u, “Kani ka EC wa katni man ko kawa sihbhah dooh na waroh hawa pait liang wanang neibhah wa hapyrdi wa em i duna ha ka poisa poilaiñ da wan leh sa ka khlam COVID-19 iwa da pyntkhoh ya i rukom krehkaam yong ka”.

Da ong u wa ka EC yong ka Council katni da yaleh ko wow thooh ki laad wow pynku yei yoh poisa ka Council heiwa da booh ya ki kyndon wa boon heipor wa e NOC, da yaleh wow pynku ya ka bai muhor (Stamp) ha ka yung kasari ka Council wa kiwi kiwi de.

Chooh chooh da ong u wa ka Council da yaleh ko wow booh ya ki Monitory Gate ha ki thaw wa em ki karkhana pynmih khyndaw-bilat tangwa da chah pynthut noh ini ha ka sorkar jylla, da pyntip u leh wa ka Council da pyrchang ko wow ebor ya ki Dolloi wow khrong dan heiwa ka bhah u man ko 60% la 40% heiwa 60% ka bhah u lai ko cha ka Council katwa ka 40% won cha ka Elaka wa u Dolloi.

Heijooh i por u Thombor da pyntip u wa katkam wa man katni ka Council dang yang ko ya ka bhah yong ka kawa kynjoh kamwa T. 63 klur heiwa na ka Major Mineral ka bhah u man ko T. 48,18,11,649; ka bhah na ka Minor Mineral won T. 12,83,43,654; katwa ka bhah na ka Motor Vehicle Tax won man ko T. 2,75,27,598.

Ya kani ka bhah ka Council da kyrmen u wa chwa ka Christmas wow yoh ya ka hanlada chi bhah leh daw ye u su ya ka tulop ki wakreh wei ini daw pynstiñ i ya ka lyngkor ka Council.

Hajrong kani ka phang wa wanrah yaklam u Andrew ha ka Dorbar Tlang ynne ka sngi, neiliang ki MDC ka liang synchaar da kyntu ki ya u Andrew wow pyndam (Withdraw) noh ya ka.

Hadien ini i klam na waroh ki MDC, neiliang u Andrew da pynsñiaw u yei mynsien wa ngaitskem wa ka Executive Committee u chimkhia ko ya ini i kaam khlem chong-klikti wei wow khut wow paan pynche na ki karkhana heiyatoh wa i lai-lait ki ya ka Council.

U Andrew chwa wow pyndam u ya kani ka phang yaklam da ong u, “Yooluti O wa neini deiwa chimkhia phi wei neiliang ki wakreh ka Council daw ye ki wow yoh ya ka tulop wa biang wei wot ka tulop leh u yang chwa ko ya ki neibynta ar bnai,” wei ini da wanrah i yei khmat sooh-rkhai hapyrdi ki MDC ka JHADC.

Share this:
Previous

Psiah Quarter Final ka Lumsohskie waka Lumshnong YWSC B ha ka Elaka Narpuh Football Tournament Champions 2021

Next

Yow man MLA hap dei thied, yei kreh hap dei thied ong u Ardent hawa pynbna pyrthai ya ka VPP