Katwa i yaklam hapyrdi ka sorkar Meghalaya wa Assam wow ya pynbait pood hapyrdi kini ki ar tylli ki jylla dang lai i, tangwa ka sorkar Assam ha kini ki kajiak sngi da phah ko ya ki bru yong ka Forest Department wow lai pynkhooid neibynta wow chna ya u sarok ha Nongwah-Mawtamur kawa haap hapoh Ri-Bhoi District.
Katkam i booh yukheiñ yong ka sorkar Meghalaya, kani ka thaw Nongwah-Mawtamur em ko yei heh wa 137.51 Sq.Km wei haap ko hapoh yong ka Jirang Constituency, wei ini i wan pynkhooid ka chnat khloo ka Assam wow chna sarok da wan na chiliang ka wah Umor.
Ka Joint Action Committee yong ka Hima Sohiong hadien wa da yoh yutip na ka chnong Mawtamur ha ka 22 tarik da lai ko cha katai ka thaw yow lai pait wei da chem yei sakhiat. Ha ini i lai, da emlang ki waheh ka chnong Mawtamur heiwa da chem sakhiat yei wan pynkhooid ya katai ka thaw da ki bru yong ka jylla Assam.
U Prominson Nongrum uwi na ki bru waheh hawa klam cha ki laad pathai khubor da ong u wa da pyntip kiwa chong chnong wa ki bru wa pynkhooid wa toh naka chnat khloo ka sorkar Assam.
U Sordar Chnong uwa da ya emlang ha ini i lai pait, u Useful Lakhmie da ong u wa katai ka thaw kawa em cha chilliang wah Umor toh kawa dang em hapoh yong ka Mawtamur wei toh ka thaw rep cha chiliang yong utai u loom, da ong wa neiliang yong ka chnong da phah ko ya ki bru yong ka Assam wa toh u sangeh chwa ya ini i kreh.
U Purningstar Shabong, uwa yahkhmat ka JAC Hima Sohiong da ong u wa neiliang yong ka JAC daw lai booh ya ka ujor syndon cha ka DC yong ka Ri-Bhoi wa toh u leh ko iyi iyi hajrong i wan kam thaw ka Assam cha Meghalaya, wei da pynsñiaw wa neiliang yong ka JAC ym chah wow leh ko iyi iyi ya kani ka thaw wow dai lane wa ka Assam u wan kam ko.
Da beiñ leh ya ka KHADC wym pait ko ya u pood yong ka wei da man iwa lyngngoh wa kam kawa ker ya i khyndaw u chyiap ym leh ko ya iyi iyi ya kani ka thaw ha Mawtamur wei ka District Council ym bna hi leh wot wow kylli wa lada em iyi iyi wa ye ko u leh wei ka KHADC ym kwah hi ko u leh iyi iyi.
