theme-sticky-logo-alt
theme-logo-alt
Advertisement ad1

Pyndep ki Regional Committee yei lai pait ya ki chnong khappood ka Ri-Bhoi, daw phah Report ha ka 30 tarik

Advertisement ad1
Advertisement ad1

Ki Regional Committee ka Assam wa Meghalaya hajrong u pood, ynne ka sngi da pynman sei lai pait ya ki kattu katni ki chnong kiwa kynthup ya ka Patgaon, Jimorigaon, Bakhlapara waka chnong Lyngkhung ki chnong kiwa em ha Ri-Bhoi District wei dang lai yaklam wow pynbait ya u pood u ang hapyrdi ki ar jylla.

Ha ini i lai pait, neiliang ka sorkar Meghalaya da yahkhmat da u Deputy Chief Minister, u Pretone Tynsong wei da emlang wa u Dasakhiatbha Lamare, u Montri ka sorkar jylla deilang wa u MLA na Jirang, u Sosthenes Sohtun wa u MLA ka Nongpoh, u Mayralborn Syiem deilang waka Deputy Commissioner ka Ri-Bhoi, ka RM Kurbah, katwa neiliang yong ka Assam da yahkhmat da u Pijush Hazarika uwa man u Montri ka sorkar Assam deilang wa ki MLA wa ki sahep sorkar.

Advertisement ad1

Ha ini i lai pait ya kini ki thaw, neiliang yong ka Regional Committee da khut ko leh ya ki paidbah wa chong chnong yong kitu ki thaw yow ap yei sur yong ki lada kwah ki wow em cha Assam næ Meghalaya, heiwa da yoo wa kiwa boon na kiwa chong chnong kwah ki wow em cha Meghalaya, wei em leh kiwi ki wym ye u e yei rai neibhah em kiwa sah cha ka bynta yong ka Assam, tangwa ki thaw kreh wei thaw rep em ki ha Meghalaya.

Hapyrdi i pynman ya ka yalang, da em napyrdi kiwa yahkhmat ka Hima Nongspung kiwa da pynche wa kini ki thaw waroh toh kiwa hapoh i pait yong ka Hima Nongspung wa ya ki pata lane ka dulir khyndaw cha kiwa chong chnong leh da e na ka yung krehkaam u Syiem ka Hima Nongspung. Kiwa yahkhmat ka Hima da pyntip leh wa ka Assam hawa wanrah ya kiwon ki kaam pynroi da jooh paan bor chwa na ka Hima, wei da pynsñiaw wa lada kiwon kiwon kiwa kwah wow lai cha Assam ye ki wow lai tangwa i thaw u neh bait i ha Meghalaya.

Hadien wa da dep pait ya kini ki thaw, neiliang u Prestone Tynsong da ong wa ini toh i lai pait wa khaddooh neiliang ka Committee wei na waroh arliang u pynkhreh ki ya ka bui (Report) kawa kdaw hajrong i sakhiat wei i kwah ki paidbah wei daw ekti ya ka Report cha jar jiar hachwa ka 30 tarik uni bnai wei hadien ini neiliang ki Montri Rangbah yong kini ki ar jylla daw pynman biang yei yachem wow leh ya iwa emkaam.

Share this:
Previous

Wot haprdi i yaklam pynbait pood, lai pynkhooid ka Assam ya ka khloo ha Mawmatur, Ri-Bhoi yow chna sarok

Next

Ym yohlaad kiwa kitkaam ka Hima Nongspung wow klam wot ha kawi wot leh ka yalang pynbait pood